Җәйге ямьле бер көндә 30 елдан артык Лесхоз бистәсе балаларын үзенекедәй тәрбияләгән, аларны тәпи йөрергә, кашык тотып ашарга һәм, беренче сүзләрен ишетеп, аларны матур итеп сөйләшергә өйрәткән, тирбәтеп йоклаткан, җырлаткан-биеткән Марданова Мөслимә Әхмәтхафизовнаның туган көне. Бу елгысы бигрәк әһәмиятле - 55 яшь тулган көн! Зур юбилей көнендә үтелгән тормыш һәм хезмәт юлына нәтиҗә ясала, хатирәләр яңартыла, барча туганнар, балалар, дуслар, хезмәттәшләр җыела. 

Мөслимә Әхмәтхафизовнаны юбилее белән котлап бакчабызга район мәгариф бүлегеннән әйдәп баручы белгеч Айгөл Шаһинуровна, профсоюз җитәкчесе Гөлнәзирә Мөдәрисовна, өлкән методист Рәмзия Мусиевна килделәр. Алар тәрбиячебезне зур бәйрәме белән котладылар һәм тәрбия өлкәсендәге нәтиҗәле хезмәте өчен Саба муниципаль районы башлыгының Рәхмәт хатын тапшырдылар. Балалар яраткан тәрбияче апаларына матур шигырьләрен, җырларын бүләк иттеләр. 

Без - тәрбиячеләр, кече тәрбиячеләр Мөслимә Әхмәтхафизовнага бик рәхмәтлебез. Ул безгә үрнәк тә, терәк тә! Без Аңа алдагы тормышында саулык-сәламәтлек, тыныч, матур көннәр, зур шатлыклар, балаларының, оныкларының игелеген күреп яшәвен телибез.