Балалар иҗат үзәгендә традицион XV «Сәләтле балачак – өметле киләчәк» балалар иҗаты фестиваль-конкурсы булып узды."Серле энә" номинациясендә 1-4 нче класслар арасында Халиуллина Сөмбел, Гараева Илсинә - 2 урын, 5-8 класслар арасында  Закирова Зәлинә, Исханова Дания - 1урын, 9-11 класслар арасында Зәйнәгыева Зәлинә - 2 урын, ә Мирзегалямов Альмир жюри призына лаек булды. "Рәсем" номинациясендә Мубараков Илнур - 2 урын, 5-8 класслар арасында Ахметшина Зәлия -1 урын, 9-11 класслар арасында Маметова Регина - 3 урынны алдылар. Җитәкчеләре Гарипова Алсу Рәшитовна.

23 нче апрель  көнне Г. Тукайның тууына 129 ел булу уңаеннан  5 класс укучылары белән “Мәңге яши, яшьни яшь Тукай!” дигән темага интеллектуаль уен үткәрелде. “Тукай оныклары” һәм “Тукай дуслары” командалары  шагыйрьнең тормыш юлы, иҗаты буенча белемнәрен  сынадылар, иҗат эшләрен якладылар. Кичә “Туган тел” җыры белән тәмамланды.

Без 4 нче класс укучылары 20 нче апрель көнне тыл ветераны Гайнанова Асия апага кунакка бардык. Асия апаның истәлекләрен зур кызыксыну белән тыңладык. Ул сугыш вакытындагы авырлыкларны, 14 яшьтән трактор артында сукачы булып йөрүен, Шәмәрдәндә вагон бушатуларын,орлык ташуларын сөйләгәндә күз яшьләрен тыеп тора алмады.Ул безгә тыныч көннәрдә генә яшәргә насыйп булсын диеп теләп калды.

20 нче апрельдән  "Язгы шәфкатьлелек атналыгы" башланып китте. Атнаның 7 көненә дә  исемнәр бирелеп, укучылар изге эшләр эшләргә ашыгалар. Шефлекка алынган әби -бабайларга булышу, һәйкәл, чишмә тирәләрен җыештыру кебек чараларны үз эченә алган бу атна беребезне дә битараф калдырмас дип ышанабыз. Гомумән атналыкларда гына түгел, ә һәрвакыт ярдәмчел, миһербанлы, ягымлы һәм шәфкатьле булырга кирәктер.

17 нче апрель көнне 4 нче класс укучылары "Балалар мәйданчыгы" проект эшен башкардылар. Эшнең максаты: Шекше авылында 5-11 яшьлек балалар өчен төзеләчәк уен мәйданчыгының макетын әзерләү.  Балалар план төзеделәр, аннары мәйданчыкта булачак объектлар турында фикер алыштылар һәм үзара эшне бүлештеләр. Әсәдуллин Альмир һәм Шигабиева Рәзинә мәйданчыкны киртә белән әйләндереп алырга булдылар. Атынгычны Мингазова Алзирә, комлыкны Мөбәрәков Илнур, тауны Закиров Ринат, утыргыч һәм фонтанны Аглиуллина Айсинә ясарга һәм Исхакова Дания мәйданчыкны төрле төстәге чәчәкләр белән бизәргә дип килештеләр. Бу эшләрен тәмамлагач, бергәләшеп беседка ясап һәм юллар салып куйдылар. Укучылар барысы да үзара килешеп, дус, ярдәмләшеп эшләгәнгә, "Балачак" дип исемләнгән уен мәйданчыгы бик зәвыклы һәм матур килеп чыкты.

"Сәләтле балачак- өметле киләчәк" XV район конкурсы фестивалендә гитаристлар триосы (Махмутова Г., Рахматуллина Г., Хусаенова Р., җит. Амирова А.Ф.) вокаль- инструменталь ансамбль номинациясендә 2 урынны яуладылар. Молодцы.

           Язлар килгән саен күпме кешенең җан ярасы сыкрый, толларның,  ятимнәрнең күңел хатирәсе яңара, күзләре яшьләнә. Бөек Ватан сугышы елларында өлкән буын әби- бабаларыбызның тормыш юллары аеруча катлаулы сынауларга дучар ителгәннәр. Шундыйларның берсе, тыл ветераны, Мирасова Наилә апа.  2 класс укучылары (кл.җит.Зиннатова Э.Ш.) Наилә апа янында кунакта булып хатирәләрне яңарттылар.Ул  авыр сугыш елларында сугыш чоры балаларының кичерешләре белән уртаклашты, илебезгә, көнебезгә тынычлык теләде.

5 класс укучылары (кл.җит. Зайнагиева З.Ф.) тыл ветераны Таһирова Зәкия апа янында булдылар. Зәкия апа үзе һәм кызы Рима апа бик күп истәлекләре белән уртаклаштылар. Укучылар буклет төзү өчен, Зәкия апа һәм аның тормыш иптәше сугыш ветераны Ислам абый турында күп язмалар, фотолар алып кайттылар. Рима апа үз истәлекләре белән уртаклашкан кулъязманы мәктәп музеена тапшырды.