Бүген гимназиядә "Татарстанда туган телләр һәм халыклар бердәмлеге елы" уңаеннан "Салават күпере" һәм "Сабантуй" журналларының баш мөхәррире Зилә Зиннур кызы Хөснетдинова һәм баш мөхәррир урынбасары Руфия Рәфкать кызы Мөхетдинова кунакта булдылар. Бәйрәмдә китапханә мөдире Гөлчирә Рәфкать кызы бик эчтәлекле чыгыш ясады. Кунакларга "Шаян йолдызлар" бию коллективы кызлары һәм егетләренең  биюләре, Госманова Раиданың "Бәйрәм белән" җыры, укучы кызларыбыз: Корбанаева Сәмирә, Хәкимуллина Мәдинә, Медведева Нәргизә, Рамазанова Зилә һәм Плотникова Полинаның шигырьләре аеруча ошады. Зилә Зиннур кызы укучыларга журналның күпкырлы эшчәнлеге турында сөйләде, актив катнашкан балаларга "Сабантуй" журналын бүләк итте. Укучылар "Салаватиклар" белән бергәләп "Әпипә" җырына биеп тә алдылар. Бу очрашу укучылар күңелендә якты истәлек булып сакланыр дип уйлыйбыз.