Мәктәпкәчә яшьтәге балаларга аеруча кызыксынучанлык хас. Алар бигрәк тә аны урап алган мөһит , тирәлек, табигатькә игътибар итәләр.Табигатьне күзәтү, аны өйрәнү, сакларга омтылу- балаларның рухи дөньясын баета, уйларга өйрәтә. Шуның өчен балалар бакчасында тирә-якны өйрәнү, табигатькә сакчыл караш, экологик тәрбия зур урын алып тора.

Тәрбияви бурычларны тормышка ашыру максатыннан балалар бакчасында күп кырлы эш алып барыла. Балалар һәр көнне чәчәкләрнең ничек үскәнен, чәчәк атуын күзәтәләр, сулар сибәләр. Шау чәчәктә утырган чәчәкләрнең матурлыгына сокланалар. Әгәр тәрбияләмәсәң, аларның шулай үсмәячәген, үсемлекләрнең тере табигать икәнен, аларның үсешенә һава, су, яктылык кирәклеген үз күзләре белән күрәләр.

Шулай ук балалар төрле бөҗәкләрне күзәтергә дә  яраталар. Һәр бөҗәкнең алты аягы, башы, башында ике мыегы, кайберсенең канаты да барлыгын бүгенге күзәтүләрдән чыгып нәтиҗә ясады балалар.