Бүген "Балкыш" лагерена йөрүчеләр өчен тагын бер бәйрәм оештырылды. Ул - Сабантуй бәйрәме. Балалар төрле уеннарда катнашып, үзләренең осталыкларын күрсәттеләр. Бәйрәмнән барысы да канәгать калды. Ахырда җиңүчеләргә бүләкләр тапшырылды. Бер укучы да бүләксез калмады.

     Сауш төп мәктәбен 2016 нчы елда җиде укучы тәмамлады. Бүген алар кулларына аттестатлар алдылар. 

23 июнь көнне мәктәбебезнең инглиз теле укытучысы Бәдретдинова Әлфия Бариевнаның туган көне. Хезмәттәшебезне чын күңелдән туган көн бәйрәме белән тәбрик итәбез! 

1941 елның 22 июне халкыбыз хәтерендә иң авыр көннәрнең берсе булып саклана. Ул көнне фашистлар Германиясе сугыш игълан итмичә генә илебезгә ябырыла. Әлеге тарихи вакыйга уңаеннан, Сауш төп мәктәбендә оештырылган  “Балкыш” лагеренда 22 июнь - Хәтер һәм кайгы көне буларак билгеләп үтелде. Лагерьның әйдаманнары әзерләгән “Бөек еллар алдында баш иябез” дип исемләнгән чарада балалар авылдашларының Бөек Ватан сугышы чорындагы авыр хезмәтләре, истәлекләр белән таныштылар, авыл үзәгендә урнашкан обелиск янына барып һәлак булган авылдашларны искә алдылар.

Иртәдән кояш кыздыра, урамда эссе, бөркү һава. Рәхәтләнеп су коенасы килә. Мишә елгасында махсус су коену урыннары булмаганлыктан, коенырга рөхсәт юк. Һәр көнне Татарстан буенча кайсыдыр районнарда балаларның суга батып үлүләре турындагы хәбәрләр килеп тора. 

   Кызарып пешкән җиләкләр, тирә-юньгә таралган үлән исләре, өздереп сайраучы кошлар тавышы - болар барысы да җәйнең күңелле мизгелләре. Балаларның да иң яраткан ел фасыллары җәйдер, мөгаен. Бераз хәлне алган укулардан соң, укучылар рәхәтләнеп ял итә: җиләк җыя, су коена, балыкка йөри, табигатьнең матурлыгын күзәтә. 

Бүген лагерьдагы көн төрле уеннар уйнап үтте. Шахмат, шашка, төрле хәрәкәтле уеннар уйналды. Көн балалар өчен бик кызыклы булды.

Бүген балалар үзләрен мода күрсәтүчеләр ролендә хис иттеләр. Һәркайсы үзенчәлекле, матур киемнәр тәкъдим итәргә тырышты. Лагерьдагы бүгенге көн  дә бәйрәм рухы белән үткәрелде.

Бүген, 15 июнь көнне, Сауш төп мәктәбе каршында оешкан "Балкыш" лагерена йөрүчеләр дару үләннәре җыю белән мәшгуль булды. Алар үги ана яфрагы, бака яфрагы һәм башка төрле үләннәр җыеп кайттылар. Анары аларны күләгә урынга җәеп киптерергә куйдылар. Хәзерге вакытта дару үләннәре җыеп кую беркемгә дә зыян итмәс иде. 

Балалар җәйге ялларын үзләре өчен файдалы һәм кызыклы итеп үткәрергә тырышалар. "Балкыш" лагерена йөрүчеләр дә вакытларын бер дә күңелсезләнеп үткәрмиләр, чөнки тәрбияче апалары берсеннән-берсе кызыклы чараларны үткәреп торалар.