Бүген “Талантлы син кеше туганым” кунакханәсенең кадерле кунагы булып гимназиягә татарның милли ризыгы булган талкыш-кәләвә пешерү остасы Равилә апа Сәйфуллина килде. Талкыш-кәләвә пешерүне Казанда беренче буларак Сәйфи Борһан башлаган. Равилә апа – шул нәселнең дәвамчысы. Татар халык ашлары йортының атаклы пешекчесе Юныс Әхмәтҗанов та нәкъ менә Равилә апаның кайнанасы - Фаһирә әби янына барып, талкыш-кәләвә әзерләргә өйрәнгән, ә соңрак, Мәскәүдә пешекчеләр күргәзмәсендә талкыш-кәләвә әзерләп, алтын медальгә лаек булгач, бу уңышын данлыклы кәләвәче Фаһирә әби өлеше дип, медальне остазына илткән...! Бу тарихның дөреслеген бүгенге кунагыбыз Равилә апа да раслады. Киләчәктә талкыш –кәләвәне дөньяга танытуда бүгенге кичәне алып барган 8 нче сыйныф укучысы Д. Фаекова да үз өлешен кертергә җыена. “Яңа бистә – талкыш-кәләвә үзәге” дип аталган фәнни эш белән укучыларның беренче Бөтенроссия фәнни – гамәли конференциясендә чыгыш ясарга әзерләнә.