Әлифба, әлифба китәсең бит инде Җыр итеп җырлыйбыз иң соңгы битеңне…
Кабатланмас балачак иленең иң зур бәйрәмнәренең берсе - Әлифба бәйрәме. Җир йөзендә кем генә булмасын, кайда гына эшләмәсен, ул зур дулкынлану белән үзенең нәни кулларына тәүге тапкыр Әлифба китабын алганын исенә төшерә, чөнки һәркемнең дә белем дөньясына беренче адымы Әлифбадан башлана... Бүген гимназиядә 1нче сыйныфларның Әлифба бәйрәме булып узды. Бәйрәмне карарга беренчеләр әти-әниләрен чакырганнар иде. Балалар Әлифба бәйрәменә бик җентекләп әзерләнгәннәр: һәр бала аерым бер хәрефне кул эшләнмәсе рәвешендә булдыра алганча ясап (ә кайберләре исә чигеп, тегеп!) килгән. Кулдан эшләнгән хәрефләрдән бик матур күргәзмә килеп чыккан! Һәр аерым хәрефкә багышланган аерым шигырьләрен балалар бик тырышып өйрәнгән. Беренчеләргә Әлифба бәйрәме әти-әниләренә мәктәп, сыйныф, укытучы, сыйныфташлары мохитендә үз-үзләрен күрсәтүдә дә сәбәп булды. Бәйрәмнең максаты - туган телебезгә соклану, горурлык хисләре тәрбияләү,тырышып укуның кирәклеген исбатлау, күп белергә омтылучанлык, һәр аерым хәрефкә, авазга, сүзгә, телгә һәм, ниһаять, тәүге китапка мәхәббәт тәрбияләү булды.