Бөек җиңү көне якынлашкан саен аңа әзерлек тә арта. Бүгенге көндә укучылар үзләренең яу кырында ятып калган бабаларының , якыннарының , туганнарының фотоларын зурайтып, заманча җиһазларда “ялтыратылган” портретлар ясау белән мәшгуль. Үлемнәре белән үлемсезлек яулаган каһарманнарның берәм-сәрәм генә сакланып калган фотолары күңелләрдә әйтеп бетергесез горурлык хисләре уята! Кайчандыр аяусыз сугыш аркасында һәлак булып, Җиңү бәйрәменең беренче елын да күрү насыйп булмаган, яисә сугыштан исән –сау кайтып та, җиңүнең 71 еллыгын каршылый алмаган мәрхүмнәребез; хәзер инде бик аз санда, ләкин әле исән-имин килеш безгә бәйрәм бүләк иткән ветераннарыбыз белән бер сафта барачак портретлар , “Үлемсез полк” булып, Бөек Җиңү көнен бәйрәм итәргә күтәреләчәк! Әлеге акциядә гимназиябездән 85 укучы катнашырга әзерләнә. Әзер портретлар аерым бер дулкынлану белән гүя бәйрәм көнен көтә... бәйрәм җиткәч исә ... җанланырлар кебек тоела бермәлгә...