Бүген гимназиянең традициясеннән булган тагын бер матур гадәт үтәлде. Башлангыч сыйныф укучыларының әти-әниләре традициягә тугры калу һәм мәктәп мәйданын матурлау йөзеннән, гимназия ишегалдына чәчәкләр утыртты. Үз йортлары белән торучы әти-әниләр арасында инде чәчәк утырту белән бик күп еллардан бирле шөгыльләнүчеләр, бу эшне үзенә кәсеп итүчеләр дә бар икән. Күмәк эшне әйдәп баручы сыйныф җитәкчесе А. Е. Харитонова үзе дә чәчәкләргә битараф түгеллеген белдерде. Тырыш укытучы өендә инде чәчәкләрен күптән утырткан. Гимназия ишегалдында да әти-әниләр һәм үзенең коллегалары белән үз тәҗрибәсеннән чыгып уртаклаша, ландшафт дизайнына караган киңәшләрен бирә. Әти-әниләр актив булгач, чәчәк утырту бик позитив башкарылды. Барысы да үз эшләреннән канәгать иде. Утырткан үсентеләр чәчәк атып, җәй буе гимназиягә матурлык өстәп торсыннар инде!