"Татар кызы. Татар егете” бәйгесе гөрләп узды. Бүген, ягъни 17 нче ноябрь көнне, мәктәптә, шаулап–гөрләп, “Татар кызы. Татар егете” бәйгесе узды. Бәйгенең шартлары район күләмендә уза торган конкурс нигезләмәсеннән алынды, ягъни бәйге-сынау шактый җитди номинацияләрдән тора иде. 5–8 һәм 10 нчы сыйныф укучылары, аларның сыйныф җитәкчеләре, татар теле һәм әдәбияты укытучылары әлеге бәйгегә ике атна дәвамында әзерлек алып бардылар.
Мәктәп сәхнәсендә 12 сыйныфның егет һәм кызлары көч сынашты. Алдан әйтеп узганча, бәйге җиңелләрдән булмады: укучылар
4 номинациядә чыгыш ясап, жюри тарафыннан җентекле бәяләнеп , һәрберсе үзләренең гадел җиңүенә иреште. 3 нче урынны 7В сыйныфыннан Хафизов Шамил һәм Гыйззәтуллина Алсу яуласа, мөхтәрәм 2 нче урынга 8Б сыйныфыннан Ситдыйков Динияр белән Хафизова Камилә лаек булды. Ә мондый бәйгеләрдә исә күпләр кызыгырлык 1 нче урынны 8В сыйныфы укучылары Минсафина Камилә һәм Гасыймов Нияз пары беркемгә дә бирмәде! Бәйгедә катнашучы укучыларыбызның костюм, презентация, сөйләм телләренә, уйнау осталыкларына сокланмаган кеше калмады!
Мәктәп директоры тарафыннан кул кысып тапшырылган дипломнарын укучылар әле озак хәтерләр.
Без исә, үз чиратыбызда, укучыларыбызны җиңүләре белән котлыйбыз! Милләтебезнең горурлыгы булып үсеп, чын татар егетләре һәм кызлары булып җитлегүләрен теләп калабыз. Аларны әзерләүдә катнашкан сыйныф җитәкчеләренә һәм татар теле укытучыларына, тәрбия эшләре буенча директор урынбасарына тирән рәхмәтебезне җиткерәбез!

Фотографии