17-19 март көннәрендә мәктәбебездә янгын профилактикасына карата чаралар узды. Сыйныф сәгатьләрендә укучылар шырпы һәм ут белән уйнарга ярамаганлыгын искә төшерделәр, куркынычсызлык кагыйдәләрен кабатладылар, янгын сүндерүчеләр белән очраштылар.

Бишнәдә узган туан як табигатен, хайваннарын һәм тарихын өйрәнүгә багышланган фәнни-гамәли конференциядә 4 нче сыйныф укучысы Сәйфетдинов Газиз 2 нче, Гыйбадуллин Әмир 3 нче урын яуладылар. Афәрин, укучылар!

Кадерле кызлар, апалар, әниләр!

Сезне язның иң беренче, иң күңелле бәйрәме – Халыкара хатын-кызлар көне – 8 Март белән тәбрик итәбез!

Язгы кояш нурлары һәм сезнең ягымлы елмаюыгыз белән яктыртылган бу көнне һәрчак түземсезләнеп көтеп алабыз. Бүген безнең илдә, күптәннән килгән традиция буенча, мәхәббәт, игелек, аналарга һәм хатын-кызларга карата тирән ихтирам хисләре тантана итә. Милләтенә, диненә, яшенә, социаль хәленә карамастан, без барча гүзәл затларыбызга дан җырлыйбыз һәм кадер-хөрмәт күрсәтәбез. Сезнең җир йөзендәге бөек вазыйфагызны Аллаһ Тәгалә үзе билгеләгән – бала тудыру, кешелекнең яшәешен дәвам итү, гүзәллек, гармония һәм камиллек идеалларына хезмәт итү.

Шагыйрьләр, рәссамнар, философлар хатын-кызга карата мәхәббәт һәм рәхмәт хисләрен белдерү өчен иң назлы сүзләр, иң җете төсләр тапканнар, иң акыллы фикерләр әйткәннәр. Хатын-кыз образларында иҗатка илһамландыручы гүзәл алиһәләрне гәүдәләндергәннәр, тылсымлы планеталарга һәм күңелне җилкендереп янучы йолдызларга алар исемен биргәннәр. Бүген, егерме беренче гасырда - космик тизлекләр чорында да без, нәкъ элеккечә, сезгә ихластан сокланып, дулкынланып карыйбыз.

Без һәммәбез "әни” дигән изге сүзне ихтирам белән телгә алабыз. Ана сөте белән кергән әхлакый кыйммәтләрне, ана теле белән кергән тиңсез рухи хәзинәне без гомер буе күңелебездә саклап, балаларыбызга, оныкларыбызга бүләк итеп тапшырабыз. Кадерле хатын-кызларыбыз, безне - дус халык, күпмилләтле бердәм ил иткән буыннар дәвамчылыгы нәкъ менә сезнең тырышлык белән гамәлгә аша.
Гасырлар буена хатын-кызның гүзәл һәм серле образы меңәрләгән иҗади чагылыш тапкан. Ләкин барыбер нидер әйтелми, нидер сурәтләнми калган кебек тоела. Бу мәңге шулай булачак, чөнки сезнең гүзәллекнең һәм камиллекнең чиге юк.

Хөрмәтле хатын-кызларыбыз, тормышыгыз шатлык белән тулсын, якын кешеләрегез кадерегезне белеп яшәсен. Безнең кыштан арыган йөрәкләребезгә язның беренче җылы нуры булып керүче бүгенге бәйрәм сәламәтлек, бәхет һәм бәрәкәт китерсен!

 Бүген 1 нче сыйныф укучылары кунакка әниләрен чакырдылар. Әлифба дәреслеге белән саубуллаштылар, 8 март бәйрәме белән тәбрикләп, әниләренә бүләкләрен тапшырдылар, җырлар-шигырьләр бүләк иттеләр.

 Бүген сайлап алу имтиханыннан җәмгыять белемен сайлаган укучылар сынап карау имтиханын эшләделәр. Имтиханнарга бик аз вакыт калып бара шул. Уңышлар сезгә!

 Бүген укучыларыбыз әти-әниләр җитәкчелегендә Галиәскәр Камал театрында булып кайттылар.  Спектакль барсының да күңеленә хуш килде.

 Бүген 9 сыйныф укучылары биологиядән сынап карау имтиханы эшләделәр.

 Бүген өлкән хатын-кызлар, студент кызлар һәм мәктәп кызлар командасы арасында волейбол ярышлары узды. Кызларыбыз ике команданы да җиңделәр. Молодцы!

21 нче февральдә кешелек дөньясы ЮНЕСКО инициативасы белән алтынчы ел рәттән Халыкара телләр көнен билгеләп үтә.. Бу көн Татарстанда Татарстан Республикасының дәүләт телләрен  һәм башка телләрне саклау һәм үстерү буенча Татарстан Республикасы дәүләт программасын үтәү кысаларында уза. Шуңа да туган телебезне саклау бүген безнең алда торган иң зур бурычларның берсе.Чөнки телебез бетсә,татар дигән милләт тә бетәчәк. Туган телебезне, милләтебезне саклау-безнең бурычыбыз. Туган телгә бер генә көн түгел, бөтен гомер бирелергә тиеш. Безнең тел үле тел түгел ул. Ул-яшәү теле. Без шул телдә уйларга,аңларга,аралашырга тиешбез. “Бүген минем туган телем үлә икән,мин үләргә әзер иртәгә”,-дип әйтүе белән Рәсүл Гамзатов мең хаклы.

 Туган тел –ул безнең балачагыбыз,гаиләбез,җәмгыятьтәге беренче аралашу телебез. Шуңа да саклыйк,хөрмәт итик ,чит сүзләр белән буямыйк аны.

Бүген мәктәпкә бер телдә шигырь сөйләмичә керү мөмкин түгел иде. Укучылар молодцы, күп шигырьләр беләләр икән.

Бүген мәктәптә татар халкының каһарман шагыйре Муса Җәлилнең тууына 110 ел тулуны билгеләп үттеләр.