Тукай укулары беренче тапкыр Татарстан Республикасы Милли музее, Габдулла Тукайның әдәби музее, Татарстан язучылар берлеге, Тукай җәмгыяте тарафыннан 1994 елда оештырылган.

Биредә  шагыйрь мирасын барлау, иҗатының әлегә кадәр күрелмәгән якларын өйрәнү мәсьәләләре күтәрелә, Тукай мирасының яңа катламнары ачыла.

Быелгы укуларда ике секция  эшләде. Беренче секция “Габдулла Тукай һәм Иске Татар бистәсе” дип аталган иде.  Анда танылган тарихчыларыбыз һәм әдәбиятчыларыбыз Иске Татар бистәсенең тарихы, аеруча аның  XIX гасыр ахры -  XX гасыр  башындагы мәдәни тормышы, архитектурасы хакындагы эзләнүләре белән уртаклаштылар. Шулай ук, секция барышында бистәдә урнашкан Г.Тукай һәм аның замандашлары белән бәйле тарихи һәйкәлләрне саклау, бистәнең яңарыш юллары кебек проблемалар күтәрелде.

Икенче  cекция “Г.Тукай иҗатына бүгенге укучыларның мөнәсәбәте” дип аталды. Анда Яшел Үзән районы мәктәпләреннән килгән укучылар чыгыш ясады. Безнең мәктәптән дә Гыймадиев Илнар һәм Гыйльманова Гөлназ уңышлы чыгыш ясадылар. Секция белән Г.Тукай җәмгыяте рәисе, филология фәннәре докторы, КФУ профессоры Миңнегулов Хатыйп Йосыф улы җитәкчелек итте. Барлыгы 18 чыгыш тыңланды. Укучылар Тукай иҗатын төрле яклап ачырга тырыштылар, ясалган чыгышлардан шагыйрь иҗатының күпкырлылыгы, тематик байлыгы күренде.

Музейда мәктәп укучылары өчен махсус экскурсия оештырылды. Укучылар музей экспонотлары ярдәмендә бөек шагыйребезнең тормыш юлын, иҗатын тагы бер тапкыр күз алларыннан кичерделәр, искә төшерделәр.

Тукай укуларыннан укучыларыбыз рухи байлык, канәгатьләнү хисләре алып кайтты.