Татар гимназиясендә  1 нче сентябрь - Белем бәйрәме көне гөрләп узды. Традиция  буенча  Белем бәйрәмен  чыгарылыш  сыйныф  укучылары алып  барды. Бәйрәм  ике  дәүләт телендә - татар һәм  рус  телләрендә узды.   Бәйрәмдә  шәһәребезнең  милли  бүлек җитәкчесе Мухамов Госман  Махмутович  һәм гимназиянең шефы  Ринат  Нуриахметович катнашты. Игътибар  үзәгендә мәктәп  бусагасын  беренче  тапкыр атлап  керүче   беренче  сыйныф  укучылары иде. Әлбәттә, бәйрәм  җырсыз- биюсез узмады. Гимназиянең  йөзек  кашы булган  "Мирас"  вокал һәм "Легенда"  хореографик  ансамбльләре укучыларның һәм  килгән  кунакларның күңелләрен  күтәрде. Шулай ук линейкада узган уку елында республикакүләм "Куркынычсыз тәгәрмәч" бәйгесендә 1 нче урын яулаган Камалиев  Әмир   грамота  һәм  истәлекле бүләккә  лаек  булды. Тантаналы  линейкадан  соң, укучылар  беренче сыйныф  сәгатенә таралдылар. Яңа  уку  елында  яңа  уңышлар  сезгә!