Ел саен 21 февраль көнне Халыкара тел көне билгеләнә.Бу көн ЮНЕСКО карары нигезендә 2000 нче елда бәйрәм ителә башлады. Хәзерге вакытта дөньяда алты меңләп тел исәпләнә. Һәркем өчен үзенең ана теле кадерле. Бакчабызга йөрүче нәниләр арасында төрле милләт вәкилләре бар, алар үзара дус, тату  яши. Халыкара туган тел көнендә балалар киемендә аларның милли атрибутикалары чагылыш тапты,  һәр төркемдә махсус эшчәнлекләр оештырылды. Татар, рус, үзбәк, мари, башкорт, удмурт милләтләре турында мәгълүматлар җиткерелде. Һәр милләтнең үзенең милли киемнәре, орнаментлары, җырлары, биюләре, бәйрәмнәре, уеннары бар. Балалар бу көнне әнә шулар белән таныштылар, биеделәр, уеннарда катнаштылар, төрле телдә бер-берсен сәламләргә өйрәнделәр. Дус булып, бердәм яшәгәндә генә бәхетле тормыш  булуына төшенделәр. Чара " Туган тел" җырын тыңлау белән төгәлләнде. Һәр халыкның төп бурычы- телне саклау. Безнең нәниләребез дә туган телләрендә иркен сөйләшсеннәр, аны сакласыннар иде.