21.02.2015 көнне Арча мәгариф идарәсенең 24 мәгариф хезмәткәреннән торган командасы республика мәгариф оешмаларының Кукмарада узган Кышкы Спартакиадасында катнашып кайтты. Чаңгы эстафетасы, шорт–трек, волейбол, дартс, идәннән күтәрелү (хатын–кызлар), турникта тартылу (ир–атлар), канат тарту, теннис ярышларында 47 команда арасында Арча районы командасы 6 урынны яулады. Ә район мәгариф идарәсе җитәкчесе Зөлфәт Дәүләтбаев үзенең оста көрәшче генә түгел, чаңгычы икәнлеген дә республика дәрәҗәсендә танытып, җитәкчеләр арасында чаңгыда узышу буенча 1 урынны алды! Афәрин, Зөлфәт Миннефарович!..

"Ватанны саклаучылар" көне уңаеннан мәктәбебезнең Кушлавыч авыл клубында балалар драмтүгәрәгенә йөрүче укучылары белән запастагы хәрбиләр очрашуы матур хатирәләр калдырды. Бу көнне укучыларыбыз Ватанга тугрылык төшенчәсен чын хәрбиләр авызыннан ишеттеләр. Соңрак Бөек Ватан сугышында һәлак булганнар истәлегенә куелган обелискка чәчәкләр салынды...

Мәктәбендә "Ватанны саклаучылар көне"нә багышланган атналык кысаларында төрле ярышлар бик мавыктыргыч узды 21 нче февраль көнне "Аҗаган" уенының финал өлеше булды. Ярышка запастагы хәрби, өлкән прапорщик Галимҗанов Габделфәт Әхәт улы да чакырылды. Ул яшь буынга армия хезмәте турында сөйләде, үзенең киңәшләрен бирде. Укучылар миналар эзләделәр. Флагны тапкан команда җиңүче итеп билгеләнде...

Мәктәбебездә көтеп алынган "Аҗаган" уеннары башланды. Әлеге хәрби патриотик уен махсус план нигезендә спорт ярышлары белән үрелеп бара. Һәр укучы уеннарда актив катнаша.  Бүгенге көндә атналык кысаларында ике команда арасында шашка уеннары башланып китте.
 

Бүген мәктәбебездә, 8-9 класс укучылары арасында Советлар Союзы герое, Шагыйрь Муса Җәлилгә багышланган "Батырлыгы белән җырларга кергән шагыйрь" дип исемләнгән интеллектуаль уен булып узды. Уенда шагыйрьнең биографиясенә, иҗатына, Җәлилчеләргә кагылышлы сорауларга укучылар бик актив җавап бирделәр...
 

Укучыларыбыз Бөек Җиңүнең 70 еллыгына багышланган район күләм хәрби-патриотик "Аҗаган" уеннарының зона ярышларында актив катнаштылар. Безнең мәктәп беренче номерлы зонада, Арча шәһәре 7нче номерлы мәктәптә чыгыш ясадылар. Ярышларны күңелле һәм бик яхшы әзерләгәннәре өчен оештыручыларга да рәхмәт сүзләребезне җиткерәбез...

    Мәктәбебездә Бөек Җиңүнең 70 еллыгына багышланган шигырь һәм җыр бәйгесе үткәрелде.  Бу кичә илебез иминлеге хакына үз гомерләрен, көчләрен һәм сәламәтлекләрен кызганмаган Бөек Ватан сугышы һәм тыл ветераннарына багышланды. Иң сәнгатьле итеп шигырь сөйләүче, иң матур итеп җыр башкаручылар билгеләнде. Балалар чын күңелдән әзерләнеп килгәннәр. Араларында бик яхшы сөйләүчеләр дә, салкынрак караганнар да бар иде. Сәнгатьлелек өстендә эшләргә безгә – тел укытучыларына эшлисе дә эшлисе дигән нәтиҗәгә килдек. Чыгышлар сугыш, Җиңү темасына презентация белән үрелеп барылды. Балалар истәлекле бүләкләрдән канәгать калдылар, катнашучыларның барысына да сертификатлар тапшырылды. Җиңүнең 70 еллыгына мондый кичәләр күпләп көтелә.

14 февраль көнне 9 нчы сыйныфта Мәгърифәтче, галим Каюм Насыйрига 190 ел тулуга багышланган ачык дәрес булып үтте. дәрестә башлангыч сыйныф укучылары катнашты. Укучылар үзләре әзерләгән презентация не кулланып язучы турында тирән мәгълүмат бирделәр. Аның тел галиме,тарихчы,этнограф,табиб, фольклорчы булуына басым ясалды. Укучылар үзләрен кызыксындырган сорауларга җаваплар алдылар.

Бәйрәм бүген бездә була –

Табышмаклар кичәсе.

Белик әле, бу мәктәптә

Кем икән иң зирәге?!

9 нчы февральдә безнең мәктәптә башлангыч класслар һәм 5 нче класс укучылары арасында “Табышмаклар кичәсе” үткәрелде. Укучыларның тапкырлыклары, зирәклекләре  сыналды. Бәйгедә ”Кем күбрәк ? “,  ”Уйлап тап!” кебек уеннар, табышмакларны укып, аңа карата рәсемнәр дә ясатылды, әзер мозайкаларга  карата үзләреннән дә табышмаклар уйлатылып  табылды. Финалга чыккан 2 укучыга сүзләре киселгән табышмак бирелеп,  алар аны тезәргә һәм җавабын табарга тиеш булды.

 Мәктәбебезнең  иң тапкыр бала исеменә 5 нче класс укучысы Шерматов Рәйхан лаек булды. Ахырдан һәрбер катнашучыга истәлекле бүләкләр, дипломнар тапшырылды.

Бүген мәктәбебездә Бөек Ватан сугышы һәм тыл батырларына ихтирам, хөрмәт тәрбияләү, тыныч тормышта да батырлык эшләүчеләр белән таныштыру максатыннан “Батыр кем ул? Батырлык юлы кайдан башлана?”  дигән темага, 7-9 класс укучылары белән берлектә , әдәби чара   үткәрелде.Кичә Батырлык! Нәрсә соң ул батырлык? Газинурлар, Матросовлар шикелле күкрәгең белән дошман амбразурасын каплаумы, әллә үзең ач чакта соңгы сынык икмәгең белән бүлешүме?Кешеләр төрле-төрле булган кебек, батырлык та күп төрле шул..” дигән эпиграф юллары белән башланып китте.

   Татар теле һәм әдәбияты укытучысы Әюпова Рания Фирдүс кызы  чараны ачып җибәреп Бөек Ватан сугышында катнашкан солдатларның батырлыклары турында сөйләде. 8 нче класс укучылары Гарипов Рәсүл,Әюпов Нәзир, Ахмадуллина Гөлназ Габдрахман Әпсәләмовның тормышы, иҗат юлы, “Газинур” әсәреннән өзекләр белән таныштырдылар...

    Кичә яу кырында мәңгегә ятып калганнарны  бер минут тынлык белән искә алып тәмамланды.

   Мәктәбебездә Бөек Җиңүнең  70 еллыгына багышлап кичәләр, класс сәгатьләре уздыру дәвам итә.