Үткән өч көн дәвамында мәктәптә "Туган телем язмышы..." шигаре астында класс сәгатьләре һәм мәктәпкүләм әдәби-музыкаль кичә оештырылды. Әлеге чараларда укучыларыбыз туган телнең тарихы, әһәмияте, милли традицияләребезне саклау турында яңа белемнәр үзләштерделәр. Туган телгә карата үз фикереңне формалаштырып ныгыту, ихтирам хисләрен тәрбияләү максатында оештырылган уен-чаралар бик эчтәлекле һәм күңелле үтте...

...Г. Тукайның "Исемдә калганнар" әсәре язылуга 105 ел тулу уңаеннан һәм татар әдәбияты дәресләрен тагы да җанландырып җибәрү максатыннан Тукаевларның Кушлавычтагы "Музей-йорты"нда дәресләр оештырылды . Зәкия Рәсүлованың "Тукай эзләреннән" китабы чыкканга 30 ел тулу уңаеннан да әзерләнгән әлеге чаралар бик эчтәлекле узды...

    Тимурчылык отрядлары арасындагы "Авылыма ярдәмгә" акциясе кызганнан-кыза бара. Алдагы көннәрдә хәбәр иткәнебезчә Иске Җөлби авылы укучылары төркеме авыл уртасында урнашкан күперне, аңа менү һәм төшү юлларын кардан чистарткан иде. Кушлавыч авылы укучылары әлеге игелекле эштән читтә калмады, авылның урамнарын тоташтыручы күперне менә дигән итеп чистартып куйганнар! Аның аркылы эшкә йөрүче өлкәннәр, әти-әниләр дә, кибет кирәк-яракларына узучы әби-бабайлар да бу игелекле эшегезгә рәхмәт сүзләре әйтеп уза...

Үзебезнең геройларыбызга, тарихыбызга ихтирам йөзеннән, патриотик хисләр тәрбияләү максатыннан һәрдаим эшләнеп торучы эшләребез быел Бөек Җиңүнең 70 еллыгы уңаеннан махсус планга да кертелде. Кышның кар-бураннары һәйкәл, обелискларны күмеп, тарихи эзләрне капламасын өчен укучыларыбыз бар көчләрен куялар...

  Кыш үзенең Яңа ел бәйрәмнәре белән генә түгел, кар-бураннары белән дә хәтердә кала. Атналар буена сузылган бураннардан басма-күперләргә кар күп салды галиҗанәп табигать. Ләкин мәктәпнең тимурчылары алдында мондый каршылыклар күз ачып йомганчы хәл ителә торган мәсьәлә. Укытучы апалары килгәнче, балалар күперне кардан арчып та куйган иделәр. Шушы күпердән, аларга рәхмәт укып, күпме әби-бабай, әти-әниләр, балалар уза. Саваплы эш эзсез югалмый ул, афәрин, балалар!

    Хөрмәтле коллегабыз, химия һәм биология укытучысы Бикчәнтәев Рәдис Әсфәндияровичны чын күңелебездән туган көне белән тәбрик итәбез!

Сез туган көн бик күңелле булган,
Табигать тә калган тынычлап.
Туган көнгә күркәм теләкләрне
Юллыйк әле, дустым, кушучлап.

Беркайчан да саулык ташламасын,
Бәхетегез булсын түгәрәк.
Шатлык арты шатлык килеп торсын,
Бала-чага үссен тәгәрәп.

Гел елмаеп, көлеп яшә әле,
Беркайчан да кайгы килмәсен.
Йөзеңдә һәрчак кояш нуры
Балкын торсын, һич тә сүнмәсен...

Ихътирам белән: хезмәттәшләрегез.

    Менә, яңа чирекне дә башлап җибәрдек. Укучыларга ныклы белемнәр җиңел бирелсен дип, коллегаларыбызга тәртипле, белем алырга омтылып торучы укучылар теләп калабыз! Инде моның өчен көч тупларлык ял да итеп алдык. Каникуллар чорында да "Хәрәкәттә бәрәкәт" эш планы буенча спорт ярышлары, фәннәр буенча конкурслар, ә иң кызыклы һәм күңеллесе "Музыкаль сандык" кичәсе үткәрдек. Укучыларыбыз яхшылап ял итеп, яңа көчләр белән укырга килделәр. УңЫшЛаР III чиректә, баш-ла-дык!..

    Мәктәп "Чыршы бәйрәме" белән башланып киткән яңа ел могҗизалары каникулларда да дәвам итә. Алдан төзелгән график буенча яңа ел ялларында мәктәптә укучыларыбыз өчен спорт уеннарында үз көчләрен сынап карау, экскурсия, җыр-бию кичәләрендә ял итү, фәннәр өлкәсендә яңа белемнәр үзләштерү мөмкинлеге булдырылды...