Зәңгәр күк йөзендә кояш балкыган чакта, шаулап-гөрләп торган апрель аенда, безнең яраткан шагыйребез Габдулла Тукай туган. Г. Тукай дөньяда бары тик 27 ел гына яшәгән. Шулай булса да, ул гаять зур, бәя биреп бетермәслек рухи байлыгын калдырган. Аның тормышы һәм иҗаты халкыбыз тарихында иң яхшы, иң изге сәхифәләребезнең берсе. Ямьле язның матур бу көнендә без Габдулла Тукайны искә алып, аның туган көнен бәйрәм итәргә булдык. Бәйрәмне зур төркем балалары һәм тәрбиячеләре оештырды. Залның бер почмагында балалар өчен язылган китаплардан һәм аның әкиятләренә карата эшләнгән рәсемнәрдән күргәзмә оештырылды. Бәйрәмдә Г. Тукайның әкиятләрендәге барлык төп геройлар да чыгыш ясадылар. Чара җыр һәм биюләр белән үрелеп барды. Балалар Г. Тукай турында үзләренә бик күп файдалы мәгълүмат алдылар.