Әхлакый- патриотик тәрбиянең нигезендә балаларда иң беренче чиратта үз туган ягыңа ярату хисе тәрбияләү ята. Элек-электән кешеләр рухи һәм әхлакый  тәрбияне югары бәяләгәннәр. Бүгенге җәмгыятьтә тирән социаль -экономик үзгәрешләр барганда  күп кенә рухи ориентирлар югала башлады. Шуңа күрә дә безнең 9нчы номерлы балалар бакчасында балаларга әхлакый-патриотик тәрбия бирү эшенә бик зур игътибар ителә. Бу эштә акцент үз халкыңның тарихын, мәдәниятен, гореф-гадәтләрен белүгә ясала, һәр халыкның үз мили  каһарманнары бар. Аларның исеме халык күңелендә мәңге саклана. Шуларның берсе - Советлар Союзы герое, күренекле шагыйрь Муса Җәлил. Быел аның тууына 113 ел. Шул уңайдан без татар теле тәрбиячеләре, Муса Җәлилнең истәлегенә багышлап”Муса абый-балаларның якын дусты” исемле әдәби-музыкаль кичә үткәрдек. Бу чараның максаты: М.Җәлилнең тормышын һәм иҗатын өйрәнүне дәвам итү, язучы белән горурлану һәм кызыксыну хисләрен тәрбияләү; балаларда туган илгә, Ватанга, үз халкыңа тугры булу, ярату хисләре тәрбияләү. Кичә барышында балалар  Муса Җәлил турында чыгыш тыңладылар, слайд-шоу карадылар, аның шигырьләрен сөйләделәр, шулай  ук  шигырьләренә язылган җырлар яңгырады.