Исәнме, мәктәп, исәнме!

Без сине сагынып беттек.

Сентябрь ае җиткәнен

Түземсезләнеп көттек.

Менә бүген син каршы ал,

Ишекләреңне ачып.

Без ныклы белем алырбыз,

Дәрт, көчләр тора ташып.

Мәктәп, син бит төп йортыбыз,

Күңел сиңа тартыла.

Бүген бөтен ил баласы

Мәктәпләргә агыла.

Каршы алыр укытучы,

Каршылар сыйныфташлар.

Көмеш авазлы кыңгырау

Тәүге дәресне башлар.

      30 август – республикада яшәүче барча халыкның уртак бәйрәме. Моннан 26 ел элек 1990 елның 30 августында Татарстанның дәүләт суверенитеты турында Декларация  кабул ителүне Республика көне буларак  бәйрәм итү күркәм традициягә  әверелде. Быел бу шатлыклы көн кабул ителүгә 26 ел тула. Бу истәлекле дата дәүләтчелегебезне ныгыту юлында яңа сәхифә ачуы белән барыбызга да кадерле. Шунысы куанычлы, республикада нинди генә милләт халкы яшәмәсен, алар барысы да тату, матур гомер кичерә. 1990 елның 30 августында ТАССР Югары Советы татар милләтенең, республикада яшәүче бөтен халыкның үзбилгеләнүгә булган аерылгысыз хокукын тормышка ашырып, аның җиргә, җир асты һәм табигый ресурсларга булган хокукы беркетелгән тарихи документ – Татарстан Совет Социалистик Республикасының дәүләт мөстәкыйльлеге турында Декларация кабул итте. Татар һәм рус телләре тигез хокуклы дәүләт телләре булып расланды, нинди милләттән булуларына, социаль чыгышлары, диннәре, сәяси инанулары нинди булуга карамастан, барлык гражданнарга тигез хокуклар гарантияләнде.

     Районда кайнаган чаралар, бәйрәмнәрдән мәктәпләр дә читтә калмый, барысында да актив катнашып баралар. Бу шимбәдә үткәрелгән ярминкә дә күңелле генә үтеп китте. Район халкы гөрләп арзан бәядән  товар алырга ашыкса, мәктәп укытучылары сатучы ролен башкарып, халыкны күзәтте, үз мәктәп бакчасында үстерелгән продукция белән сату итте. Безнең мәктәпнең дә ассортименты зур иде - яшелчә, җиләк-җимеш, төрле кайнатмалар, салатлар, дару үләннәре, корт балы һәм башкалар. Ярминкә укытучылар катнашында әзерләнгән концерт номерларына үрелеп барды. Шулай ук район башлыгы тарафыннан да бәяләнде.

       27 нче август көнне Арчаның Җиңү паркында мәктәп һәм балалар бакчаларының чәчәк күргәзмәсе үтте. Күргәзмәдә һәр оешма бүлеп бирелгән темага чәчәкләрдән  композиция ясарга тиеш иде. Хыяллана белсәң, идеяларга бай булсаң нәрсәләр генә кыландырып булмый икән чәчәкләрдән?! Композицияларга Арча муниципаль район башлыгы Илшат Габделфәрт улы, мәгариф бүлеге идарәсе башлыгы Зөлфәт Миннефәр улы бәя бирде. Шәһәр халкы да, балалар да күргәзмәне таң калып күзәттеләр.