Җәй – ул үзе бер тормыш. Баланың жәйге ялы истә калырлык, кызыклы һәм матур, вакыйгаларга бай итеп үтсен дисәгез, әлбәттә лагерьга йорергә кирэк! Лагерь - ул балаларны тәрбияләү, аларны төрле чараларга җәлеп итү өчен менә дигән урын.
Бу – уку елы дәвамында арыганнарны бетерү, яңа көч туплау, сәламәтлекне ныгыту, балаларның иркенләп бер-берсе белән аралашу очен бердәнбер мөмкинлек.
Безнең гимназиябездә дә көтеп алынган "Галәм - Сamp" дип исемләнгән җәйге лагерь үз эшен башлап җибәрде. Көн дәвамында төрле чаралар булды.
Кыскасы, лагерьның беренче көне күңелле, кызыклы һәм шул ук вакытта файдалы узды дисәк тә дөрес булыр. 

Күптән түгел 5а һәм 8а сыйныфы укучылары җитәкчеләре белән берлектә Ижевск шәһәрендә сәяхәттә булып кайттылар. Шәһәр буенча йөреп, аның тарихы белән таныштылар, хәрби корал җитештерү заводы барлыгы турында белделәр, зоопаркта яшәүче хайваннарны күзәттеләр." Зоопаркта иң ошаганы тюленьнәр белән тамаша булды"- ди алар. Балалар күңелендә онытылмас мизгелләр калдырган Ижевск шәһәре биографиясенә күз салу һәркемне кызыклы мәгълүматка баетты.

Бүген 5А сыйныф укучылары «Иске-Татар бистәсе: вакыт буйлап хәрәкәт» дип исемләнгән экскурсия-квестка барып Казан тарихы буенча белемнәрен тулыландырып кайттылар.
Иске Татар бистәсендә яшәгән сәүдәгәрләр, мәгърифәтчеләр язмышы, Юнысов мәйданы, Мәрҗәни, Апанай мәчетләре тарихы һәм Кабан күленең серләренә багышланган экскурсиянең иң кызыклы өлеше квест булды.
«Балалар мавыктыргыч биремнәр лабиринты үткәндә Казан татарларының элек ничек яшәгәннәре, күренекле сәүдәгәрләр династияләре һәм аларның тарихи биналары турында кызыклы фактлар белделәр. Кабан күле серләре белән таныштылар. Әлеге сәяхәттән соң Казанның матур урыннары белән танышуны дәвам итәргә теләкләребез туды» - дип бүлеште сыйныф җитәкчесе Гөлчәчәк Әсхәтовна.

Күптән түгел 1б, 1в, 1г сыйныфы укучылары
Биектау районы Ямашурма авылы җирлегендә урнашкан "Страус-парк"та кызыклы, күңелле сәяхәттә булып кайттылар.
"Монда кошларның иң экзотик һәм матур төрләренең берсе - Африка страусларын күрергә мөмкин.
Экскурсиядән соң страуслар белән фотога төшәргә, аларны кишер, алма яки кәбестә белән сыйларга да була.
Мондый җәнлекләрдән тыш, монда башка кызыклы хайваннар да күп - кәҗәләр, казлар, тавыклар, атлар һәм башка хайваннар. Бигрәк тә балаларга бу бару истә калачак. Алар хайваннар белән аралашудан соклану тойдылар. Анда яшәүчеләрнең барысын да тотып кына калмыйча, ашатып та була бит. Кызыктыргыч экскурсия барышында үзебез дә китап битләрендә табылмаган күп кенә файдалы мәгълүматны белә алдык"- ди, 1б сыйныфы җитәкчесе Лилия Гансовна.

Шатлыклар күңелебездә,
Ак кояш күгебездә.
Килегез, дуслар, кунакка:
Сабантуй бүген бездә!
24 нче май көнне 1а сыйныфы табигатькә чыгып бик күңелле "Сабантуй" бәйрәме уздырды.
"Сабантуй — ул хезмәт, дуслык һәм әлбәттә инде һәркемнең көтеп алган изге бәйрәме. Сезне шушы бәйрәм белән чын күңелдән котлыйбыз! Илебезгә, җиребезгә тынычлык, гаиләгезгә иминлек, саулык телибез!" - дип үз теләкләрен белдерде сыйныф җитәкчеләре, Гөлфия Рөстәмовна.
Милли бәйрәмебез - Сабантуй ачык дип игьлан ителә!

24 нче май көнне 4б сыйныфы укучылары 7нче номерлы янгын сүндерүчеләр бүлегендә сәяхәттә булып кайттылар. Алар янгын сүндерүчеләрнең героик эшләре турында күп кенә яңалыклар белделәр, техника белән таныштылар, уку кабинетларында, ял бүлмәсендә булдылар. Һәм әлбәттә инде үзләрен дә бу эштә сынап карадылар.
"Янгын сүндерүче көчле, кыю, җитез, акыллы булырга тиеш, чөнки ут белән көрәштә ул гомерне куркыныч астына куя.
Кешеләрне коткару - авыр һәм мөһим эш" - ди, сыйныф җитәкчеләре Рушания Мингазетдиновна

Очар вакыт җиткән кошлар да бит
Утырмыйлар мәңге ояда.
Аннан сезгә җан җылысы күчсә
Сездән күчсен җылы дөньяга.
Алда сезне олы юллар көтә,
Бәхетләргә диләр юл урау.
Урау юллар турыланыр әле,
Алга дәшә соңгы кыңгырау.
Бүген гимназиябездә 11 нче сыйныф укучылары өчен соңгы кыңгырау чыңлады. Бәйрәм белән укучыларны 1 сыйныф укучылары, әти-әнилэр, директорыбыз Гөлшат Әбүзәровна һәм яраткан укытучылары котлады. Бәйрәмгә килгән кунакларны да күңелләре белән ерак балачак елларына алып киткән, күзләрне дымландырган бу тантанада күңелле һәм моңсу мизгелләр күп булды.
Әйе, вакыт сиздерми генә үтеп киткән, инде балаларыгыз канат чыгарып үз ояларыннан очып китәргә җыеналар. Балачак инде артта калды. Алда беренче сынаулар көтә. Ни генә булмасын, имтиханнарны уңышлы тапшыруыгызны телибез! Сезгә дөньяның матурлыгын, тормышның асылын, яшәү ямен һәм мәгънәсен аңлап яшәргә язсын.
Ак юл сезгә, укучылар!

22 нче май көнне гимназиябездә 2022 - 2023 уку елы һәм 4 нче чирек тәмамлануга йомгак ясап, линейка үткәрелде.
"Бу ел бигрәк тә уңышлы булды, укучыларыбызның, укытучыларыбызның нәтиҗәләренә сөенеп туймаслык" - ди, директорыбыз Гөлшат Әбүзаровна

Гимназиябездә профориентация юнәлеше буенча һәрдаим эш алып барыла. Бүген дә 8-10 нчы сыйныф укучылары хәзерге заманда актуаль һәм кирәкле булган һөнәрләр белән таныштылар, үзләрен кызыксындырган сорауларга җаваплар таптылар.

Бүген гимназиябездә "Сәләт- Мәрҗән" клубы активистлары "Нәрсә? Кайда? Кайчан?" дип аталган интеллектуаль уен уздырдылар. 7 нче , 8 нче,10 нчы сыйныфлар өч турда белемнәрен сынадылар. Шулай ук укучылар Сәләт турында күбрәк белделәр, жырладылар һәм биеделәр. Уен ахырында 3 урын билгеләнде:
3 урын - "Өчпочмаклар" командасы
2 урын - "Shine" командасы
1 урын- "Единая Россия" командасы булды
Әлеге чара укучыларга бик ошады! Без үз чиратыбызда "Сәләт- Мәрҗән" клубына рәхмәтләребезне белдерәбез!!!