Мәктәп яны тәҗрибә участогында язгы эшләр дәвам итә. Бәрәңге утырту, кишер, чөгендер чәчү эшләрендә укучылар да теләп катнаша.

5нче сыйныф укучылары класс җитәкчеләре Халикова Илиза Нәсих кызы җитәкчелегендә авылыбызның аксакалы, Бөек Ватан сугышы ветераны  Шакиров Вәзыйх бабайга һәрвакыт ярдәм итеп, хәлен белеп торалар. Җиңү бәйрәме көннәрендә дә алар аны ялгыз калдырмадылар, янына барып, бәйрәм белән котладылар, бүләкләр, күчтәнәчләр белән хөрмәтләделәр. Бу уңган коллектив җәйге яллар вакытында да Вәзыйх бабайны онытмаячаклар, аңа һәрчак ярдәм итеп, хәлен белеп торачаклар. Барлык балалар да шулай игътибарлы, игелекле булсыннар иде! 

Безнең укучылар Карт авылында яңа һәйкәл ачылу тантанасында катнашып, чыгыш ясап кайттылар. 

Бүген зур бәйрәм! Бөек Җиңүнең 69 еллыгы уңаеннан авылыбызда тантаналы митинг  булып узды. Бөек Ватан сугышында катнашып, ил азатлыгы өчен һәлак булган авылдашларыбыз хөрмәтенә куелган һәйкәл янына сугыш һәм тыл ветераннары, сугыш чоры балалары, укучылар, укытучылар, авылдашлар җыелды. Тантаналы митингта районнан килгән вәкил - Харисов Дәниф Әсрар улы да катнашты. Безнең укучыларның чыгышлары һәркем тарафыннан да бик җылы кабул ителде. 

Үтеп киткән ял көннәрендә 6 сыйныф коллективы үзләренә билгеләнгән урамнарда яшәүче әби-бабайларга ярдәм итәргә бардылар. Әби-бабайлар аларны көтеп ала. Укучыларыбыз да бик яраталар шефлыкка йөрергә. Өлкәннәрнең рәхмәтләрен ишетү күңелгә бик рәхәт шул!

Бүген иртәнге линейкада укучыларыбызга "Олимпус"Бөтенроссия олимпиадасында катнашучы дипломнары тапшырылды. Ә берничә укучыбыз җиңүче дипломнары белән бүләкләнде. Араларында икешәр фәннән призлы урын алган укучыларыбыз бар. Шулай ук укытучылар да дипломнар белән бүләкләнде. Котлыйбыз!

Белгәнебезчә, 5 апрельдән 30 майга кадәр агач утырту айлыгы игълан ителде. Бүген 7 класс укучылары Гәрәев Наил Назыйф улы җитәкчелегендә агач утыртуда катнаштылар.

Бүген бөек шагыйребез Габдулла Тукайның туган көне. Бу зур бәйрәмне укучылар һәр елны көтеп ала. Быел да бәйрәмгә әзерлек эшләре алдан ук төзелгән план буенча алып барылды. Башлангыч сыйныф укучылары Тукай бабайның әсәрләрен сәхнәләштерделәр. 1 класслар - "Эш беткәч уйнарга ярый", 2 класслар - "Кызыклы шәкерт", 3 класслар - "Бала белән күбәләк", 4 класслар - "Су анасы", " Фатыйма илә кошчык" шигырьләрен уйнап күрсәттеләр. Бәйрәмгә "Ромашка" балалар бакчасыннан нәни дусларыбыз килде. Кичәбезне "Туган тел" җыры белән төгәлләдек.

Тукаебыз туган көнгә багышлап 5-9 сыйныф укучылары газеталар чыгардылар. Һәрбере класс үз газетасын яклады. 6 класс укучылары чыгарган "Без Тукай оныклары" исемле газета  аеруча уңышлы дип табылды. Шулай ук 5нче, 7нче классларның да газеталары мактауга лаек. Ә иң оста яклаучылар - 5 сыйныф укучылары! Котлыйбыз аларны.  10 сыйныф укучылары Тукайның тормышы һәм иҗатына багышлап буклет чыгарганнар иде. Барыгызга да зур рәхмәт!

Габдулла Тукайның 128 еллыгына багышлап, мәктәбебездә бик күңелле кичә узды. Кичәдә 5-11 сыйныф укучылары, укытучылар  катнашты.  ГабдуллаТукайның иҗаты, тормышы турында тирән эчтәлекле чыгышлар, шигырьләр сөйләнде, Тукай шигырьләренә язылган җырлар җырланды. Соңыннан бөек шагыйребезгә багышланган "Безнең уен" интеллектуаль бәйге үткәрелде. Бәйгедә 7 сыйныф укучылары җиңеп чыкты. Без бөек Тукаебыз иҗатын яратабыз, укыйбыз, өйрәнәбез!