Бүген барыбыз өчен дә иң тантаналы һәм истәлекле көннәрнең берсе. Бүген безнең чыгарылыш класс укучылары өчен соңгы онлайн кыңгыравы яңгырады. “Соңгы кыңгырау”- ул  мәктәпне тәмамлап зур тормышка, олы дөньяга юл алган егет-кызларны алдагы көннәрнең гаҗәп матур да,тынгысыз да,соклангыч та һәм авыр да булуын искәртеп тора кебек.  Бу мәктәпне тәмамлап китүчеләрнең хушлашу тавышы да. Нәкъ 9 ел элек менә шушы балаларны, 6 сабыйны, әниләре матур итеп киендереп, кулларына зур бәйләм чәчәкләр тоттырып,  бүгенгедәй җитәкләп, беренче сыйныфка алып килделәр. Һәм карагыз, нинди күркәм егетләр һәм кызлар алар бүгенге  көндә! Алар янында әниләре кечкенә генә булып калганнар. Быел безнең мәктәпне 6 укучы тәмамлый. Бүген аларның бәйрәме! Ак юллар сезгә укучыларыбыз!
 

Бүген 9 нчы сыйныф укучыларының онлайн проект эшләрен яклау оештырылды. Укучылар эчтәлекле һәм кызыклы темаларга чыгыш ясадылар. Укытучылар тарафыннан эшләре югары бәяләнде.

  Ел саен 18 май көнне бөтен дөньяның музей хезмәткәрләре үзләренең һөнәри бәйрәмнәрен билгеләп үтә. Халыкара музейлар көне 1977 елдан башлап билгеләп үтелә. Ә 1978 елдан башлап Халыкара музейлар көне 150дән артык илдә билгеләп үтелә башлый.

Музейлар аша җәмгыять үзенең тарихи-мәдәни мираска мөнәсәбәтен белдерә дип санала.  Матди һәм рухи мәдәният һәйкәлләрнен җыеп һәм саклап, музейлар зур фәнни-агарту һәм белем бирү-тәрбияләү эшләрен башкара.

  Ел да 15 майда - табигатьнең иң гүзәл вакытында Халыкара гаилә көнен билгеләп үтәбез. Үз йортында бәхетле булган гына бәхетле. Кеше яшәешенең асылын шушы гап-гади сүзләр ача да сала. Гаилә бәйрәме дә бәхетле булуның һәм үзара аңлашып яшәүнең кыйммәтен тагын бер мәртәбә искәртү өчен тәгаенләнә. Авылыбызда матур, үрнәк гаиләләр бихисап. Аларның күбесе тормыш юлыннан гомер буе матур итеп атлаучылар, пар канатлы, бер-берсеннән башка яши алмаучы, бер-берсенә кайгыртып, яратып эндәшүче матур гаиләләр.Гаилә ул- әти,әни, балалар, баш өстендә бер түбә, бер ук фамилияләр, озын, буыннан- буынга өзелмичә дәвам итүче тирән тамырлы нәсел җебе.Бәйрәм белән!  Һәр гаиләгә бәхет һәм иминлек телибез.

 Бүгенге тәрбия сәгатьләре ТАССРның 100 еллыгы, Арча районы оешуга 90 ел тулу уңаеннан уздырылды. Укучылар бу истәлекле даталар аша республикабыз уңышлары, районыбыз тарихы белән таныштылар.

 Җиңү көне уңаеннан һәйкәлгә венок куелды.

  Тиздән Бөек Җиңү көне килеп җитә. Шул уңайдан илебездә барган "Георгиев лентасы" акциясенә безнең укучыларыбызда актив катнаштылар.

 Мәктәбебездә Бөек Җиңүнең 75 еллыгына багышланган чаралар дәвам итә. Укучыларыбыз ветераннарның батырлыкларын хөрмәтләп, йөрәк җылыларын кушып, Җиңү открыткалары ясадылар.

  Агач утырту изге һәм файдалы хезмәт. Бөтенроссия агач утырту көне уңаеннан, үзчикләү булу сәбәпле, өйләр тирәсенә агачлар утырту дәвам итә.