Балалар бакчасында тәрбияләнүче нәниләр көндәлек режим буенча саф һавада күп уйныйлар, хәрәкәт итәләр. Саф һавада хәрәкәт итү матдәләр алмашын, кан әйләнешен тәэмин итә, аппетитны үстерә. Балалар каршылыкларны җиңәргә өйрәнә, җитезлектә, кыюлыкта камилләшә. Аларда хәрәкәт итү үсә, кәеф күтәренкелеге тотрыклана.

Менә бүген нәниләр кышны үзләренчә күңелле итеп озатып калырга теләк белдерделәр. Үз куллары белән Кар бабай ясадылар, аның тирәсендә күмәк уеннар уйнадылар.

Бүген дәресләрдән соң укучылар чираттагы "Юл әлифбасы" түгәрәгенә ашыктылар.

Юл аркылы чыкканда,

Уңга – сулга карарга

Өйрәтәләр мәктәпләрдә, мәктәпләрдә.

Светофорны тыңларга,

Кагыйдәне бозмаска

Өйрәтәләр мәктәпләрдә, мәктәпләрдә.

Бүген Пешәнгер башлангыч мәктәп-балалар бакчасында 8 Март Халыкара хатын-кызлар көненә багышланган бәйрәм чарасы үтте. Әлеге чара республикабызда игълан ителгән Эшче һөнәрләр елына бәйләнеп алып барылды. Әниләребезнең һәрберсе үзенең һөнәре турында сөйләде, укучыларга киләчәктә үз һөнәрен сайлауда ярдәм  итәрдәй файдалы киңәшләрен бирде. Укучыларның һәрберсе әниләренә багышлап матур шигырьләр, монлы җырлар, дәртле биюләр башкардылар. Әлеге бәйрәмне шундый эчтәлекле, балалар өчен икеләтә файдалы итеп оештыруда үз өлешләрен керткән өчен әниләргә рәхмәт белдерәбез.

Халыкара хатын-кызлар көне 8 нче Март якынлашып килә. Укучылар әниләренә үз куллары белән бүләкләр әзерләделәр. Балаларның нәни куллары белән, бөтен тырышлыгын куеп, йөрәк җылысын салып, башкарылган бу бүләкләр әниләрнең күңеленә хуш килер.

Наз гөлләре чыга үсеп

Сез үткән буш җирләрдән.

Алыгыз сез кабул итеп

Бу бүләкләрне бездән!

Кечкенәләр төркемендә тәрбияләнүче балалар "Геометрик фигуралар иле"нә   сәяхәт иттеләр. Эшчәнлек барышында тәрбияче нәниләрнең геометрик фигуралар һәм  төп төсләр турында элементар математик күзаллауларын ныгытты. 

Саулыгың бит үз кулыңда,

Чыгарма тик исеңнән.

Һәрчак хәрәкәттә булып

Яшә, эшлә бүгеннән.

Шул максатны алга куеп

Без үсәбез гөр килеп,

Һәр нәрсәдән ямь табабыз,

Яшибез җаен белеп.

Бүген мәктәптә чаңгы буенча ярыш үтте. Укучылар ярышта актив катнаштылар.

Бүген мәктәптә "Без бергә!" халык иҗаты конкурс-фестиваленең мәктәп этабы үтте. 

1972 елның 1 мартында Халыкара гражданнар оборонасы оешмасы төзелә. Бу көн Бөтендөнья гражданнар оборонасы көне буларак билгеләп үтелә. 

Бу көнне безнең мәктәптә эвакуация буенча өйрәнүләр үтте.

Бүген Пешәнгер башлангыч мәктәп-балалар бакчасында "Рәхмәт сиңа, Әлифбам!" дип, исемләнгән бәйрәм булып узды. Хәзер беренче сыйныф укучылары Әлифба китабын үзләштерделәр, бар хәрефләрне дә танып, дөрес итеп укый, яза, саный беләләр. Бүгенге бәйрәмдә Әлифба, Азбука, Математика кебек геройлар аларның белемнәрен төрле биремнәр аша сынап карадылар. Әлифба китабы "эстафета таягын" Әдәби укуга тапшырды. Бәйрәм барышында тамашачылар беренче сыйныф укучыларының  җыр-биюгә дә, нәфис сүзгә дә оста булуларын күрделәр. Бәйрәмгә хөрмәтле кунакларыбыз -  беренче сыйныф укучыларының әниләре дә килгән иде. Әлеге бәйрәм  балалар бакчасында тәрбияләнүче нәниләребезнең күңелләренә дә хуш килде. 

Беренче сыйныф укучыларын зур җиңүләре белән котлыйбыз! Ә укытучылары Галәүтдинова И.Р.га әти-әниләр һәм мәктәп коллективы исеменнән олы рәхмәтебезне ирештерәбез! Уңышлар сезгә!

2019 нчы ел республикабызда Эшче һөнәрләр елы буларак игълан ителде. Шул унайдан безнең мәктәп-бакчада төрле чаралар үтә. Бүген балалар бакчасында тәрбияләнүче нәниләребез мәктәп-бакча ашханәсендә пешекче һөнәре, аның эш урыны белән якыннанрак таныштылар.