Игътибар! Җәяүлеләрдән яктылык сирпелергә тиеш.

Гражданнарның  киемнәрендә яктылык кайтаргыч элементлар булу нигә кирәк?

Фликер нәрсәне аңлата?

Фликер – яктылыкны кире кайтаручы элемент. Ул юлдагы җәяүлеләрне һәлакәттән коткарып кала ала. Фликер - яктылык җитәрлек булмаган  шартларда күренеп торуны тәэмин итеп, транспорт йөри торган юлда үзеңне күрсәтүнең бердәнбер ысулы, дияргә дә мөмкин.  Фликерны үзең белән йөртү тәүлекнең караңгы вакытында җәяүленең  тапталу  куркынычын 6-8 тапкыр киметә! Фараларның якын уты  белән хәрәкәт иткәндә, яктылык кайтаргыч элементы булган җәяүлене шоферлар 130-140 метр ераклыктан ук күреп ала, ә ансыз – 25-40 метрдан гына. 

Закон юл хәрәкәтендә катнашучыларга яктылык кайтаргычлар: фликерлар, яктылык кайтаручы беләзекләр кулланырга куша, жилетлар кияргә тәкъдим итә.

Саклык барыбыздан да тора. Бергәләп юл кагыйдәләрен үтәсәк, киңәшләрне истә тотсак, фаҗигаләр санын киметә дә алыр идек!

   Район башлыгы Миңнеханов Рәис Нургали улы катнашында Лесхоз мәдәният йортында үткәрелгән чыршы бәйрәменнән мәктәбебез укучылары зур канәгатьләнү хисләре кичереп кайттылар. Чөнки бәйрәм балалар күңелендә озак сакланырлык итеп оештырылган иде.  Бу искиткеч тамашада бер бала да читтә калмады: җырлады, уйнады, биеде, чыршы тирәли әйләнде. Яңа ел сюрпризлары да күп булды. Бу чын мәгънәсендә аралашу, дуслашу бәйрәменә әверелде. Бәйрәм соңында барлык балаларга район башлыгының күчтәнәче һәм "Нарат" боз сараена гаилә белән бару өчен сертификатлар тапшырылды. Җитәкчеләребезгә һәм бәйрәмне оештыручыларга олы рәхмәтебезне җиткерәбез.

  Укучыларның кышкы каникуллары бара. 25 нче декабрь көнне 6-7 нче сыйныфлар «Сабантуй» комплексында булып, ат спорты серләренә төшенеп кайттылар.  

Исәнме, чыршы, исәнме,

Яңа ел килеп җитте.

Күңелле чыршы бәйрәмен

Балалар сагынып көтте.

   Бүген башлангыч сыйныф укучылары өчен «Чыршы бәйрәме» үткәрелде. Укучылар бизәлгән чыршы тирәсендә төрле әкият геройлары булып уйнадылар, биеделәр, җырладылар, шигырьләр сөйләделәр. Бәйрәм тантанасына укучыларның әти-әниләре дә килгән иде.

   2018 нче ел - Көнчыгыш календаре буенча Эт елы. Кар сыннары ясаганда без эт персонажы кергән мультсериал, кино һәм башка чыганаклардан файдаландык.