Балаларга юл хәрәкәте билгеләрен, кагыйдәләрен искә төшерү, ныгыту; балаларда мөстәкыйльлек, ярдәмчеллек хисләре тәрбияләү; урамда үз-үзләрен тоту кагыйдәләренә өйрәтү максатыннан балалар бакчасында зурлар төркеме балалары һәм ата-аналары катнашында "Юл билгеләре иленә сәяхәт" дип аталган бәйрәм иртәсе үткәрелде. Бәйрәм иртәсе кунагы -  ЮХИДИ фонды директоры Р.З. Сәетова балаларга юл йөрү кагыйдәләренә өйрәтүче китаплар, брошюралар бүләк итте.

Бүген балалар бакчасында "Кошлар көне" билгеләп үтелде. Балаларның кышлаучы һәм җылы якка очучы кошлар турында белемнәре сыналды һәм ныгытылды. Бәйрәмне "Нарасый" төркеме балалары белән тәрбиячеләр Максутова Ләйсән һәм Мирзасалихова Лилия оештырдылар.

Бүген балалар бакчасына сәнгать мәктәбенең баян классы укучылары кунакка керделәр. Алар баянда төрле көйләр уйнап күрсәттеләр. Җитәкчеләре Флүн Камалов балаларны баян серләренә өйрәнергә чакырды. Балалар бик кызыксынып тыңлап утырдылар.

Җәйге сезонга әзерлек башланды. Балалар бакчасы участогына утыртырга чәчәк үсентеләре үстерәбез.

Тәрбиячеләрнең тәрәзә төпләрендәге "тәҗрибә участоклары" гөрләп үсә. Урамда кар булуга карамастан, балалар табигать уянганын күзәтеп хозурлана.

Бүген балалар бакчсында "Теремкәй" уртанчылар- зурлар төркеме балалары "Нәүрүз" бәйрәмен билгеләп үттеләр. Башка төркем балалары рәхәтләнеп тамаша карады.

Бүген мәктәпкә әзерлек төркеме балалары әти-әниләр игътибарына "Сертотмас үрдәк" әкиятен тәкъдим иттеләр, Нәүрүз бәйрәме үткәрделәр.

Бүген балалар бакчасыда район тәрбиячеләр киңәшмәсе булды. Ясле төркемендә Л.Максутова, 2 кечкенәләр төркемендә А. Идрисова ачык шөгыль күрсәттеләр, мәктәпкә әзерлек балалары "Сертотмас үрдәк" әкиятен сәхнәләштерделәр (тәрбиячеләр Ф.Закирова, Л. Мирзасалихова, музыка җитәкчесе А. Фаррахова). Соңыннан тәрбиячеләр шөгыльләргә анализ ясадылар, тәрбияче Л. Султанованың чыгышын тыңладылар. Тәрбияче Л. Максутова төсле тоз белән рәсем ясау буенча мастер-класс күрсәтте.

"Ак калфак" хатын-кызлар республика иҗтимагый оешмасының Актаныш муниципаль районы бүлекчәсе оештырган "Кулъяулыгым - бүләгем" чигелгән кулъяулыклар район конкурсында безнең балалар Мөхәмәдиев Әмир белән Хаҗиева Алия 1 урын алып кайттылар. Балаларны тәрбиячеләр Солтанова Лилия белән Әгъләмова Розалия әзерләде. Афәрин!!!

 Ясле төркемендә бүген гаилә бәйрәме үткәрелде. Бәйрәмнән әти-әниләр дә балалар да бик канәгать калдылар.