Мультфильмнарның  тәрбияви әһәмияте бәхәссез.Шулай ук  белем бирү һәм телгә өйрәтү чарасы да булып тора. “Татармультфильм” оешмасы моннан берничә ел элек кенә оешса да, Татарстанда, Россиядә генә түгел,чит илдә дә танылган оешма.Әлеге берләшмә вәкилләре 17 апрель көнне Актанышта укучылар белән очраштылар.Бу эшлекле чарага районыбызның барлык мәктәпләреннән дә укучылар килде. Очрашу  Татар Автономияле Совет Социалистик Республикасы (ТАССР) оешканга 100ел тулуга багышланган видеофильм карау белән башланып китте.Укучылар рәсемнәр ясау белән генә чикләнмәделәр, аларга сулыш өрделәр,аралаштылар.Иң куанычлысы- узган ел Актаныш укучылары белән аралашып, аларның рәсемнәре нигезендә эшләнгән мультфильмны үз күзләре белән күрү булды,билгеле. “Татармультфильм” оешмасы вәкилләре  сентябрь аенда укучыларыбызның хезмәте көтеп алынган мультфильм рәвешендә тәкъдим ителәчәген әйттеләр.

"Куркынычсыз тәгәрмәч"республика бәйгесенең муниципаль этабы 26 мәктәптән укучыларны үзенә җыйды.Командалар беренче ярдәм күрсәтү, юл хәрәкәте кагыйдәләрен белү, агитбригада чыгышы, велосипедта фигуралы йөрү буенча көч сынаштылар.Килгән команадалар бик белемле һәм хәзерлекле иде.Җиңүчеләр дә билгеле:
1 урын - Актаныш 2 нче урта мәктәбе;
2 урын - Яңа Әлем  гомуми белем бирү мәктәбе;
3 урын - Актаныш 1 нче урта мәктәбе.
Җиңүчеләрне котлыйбыз!Республикада район данын якларга баручы командага уңышлар телибез.

Балалар иҗат үзәгендә кошлар көне үтте.Түгәрәкләргә йөрүче балалар кошлар турында белемнәрен арттырдылар. Төрле биремнәр үтәделәр,кошларга багышлап шигырьләр сөйләделәр, табышмакларга җаваплар таптылар.Күмәк уеннар вакытында да кошлар турында белемнәр бик кирәк булып чыкты.Кошлар- безнең дусларыбыз.Аларны сакларга да,якларга да кирәклеген бүгенге тамашада катнашкан балалар кабат искә төшерделәр.

"Созвездие-Йолдызлык 2018"фестиваль - бәйгесенең республика туры дәвам итә.Районнан бәйгегә киткән коллективлар арасында "Образ" бию төркеме дә өч биючеләр группасы белән чыгыш ясый.Сайлап алу турыннан кечкенәләр группасы Диплом белән бүләкләнеп кайттылар.Киләчәктә дә иҗади уңышлар телибез! Җитәкчеләре- Миндияров Р.В. һәм Романова Н.С.

Кече яшьтәге балалар белән әвәләү,төрле материаллар белән предметлар ясау,аларны бизәү,эшнең серләренә төшендерү- Гөлнара Фигатъ кызының төп максаты. Эшчәнлекнең барышы, балаларның нинди күнекмәләр үзләштерүе турында әти-әниләр ачык дәресләрдә катнашып таныштылар.Космонавтика көненә багышланган ачык дәрес бик кызыклы үтте.Әти-әниләр үзләре дә канәгать калдылар.Кече яшьтән алган белем,күнекмәләр мәктәптә белем алуга ныклы нигез булып тора.

      Актаныш Балалар иҗат үзәге район укучылары, педагоглары белән берлектә Мөслимдә узган “Без бергә” фестиваль-бәйгедә уңышлы чыгыш ясадылар.Инструменталь һәм халык ансамбльләре, ялгыз һәм күмәк бию, җыр,нәфис сүз номинацияләрендә осталыкларын сынадылар.Бәйгедә Сарман,Азнакай, Мөслим,Минзәлә районнарыннан да иң-иңнәр көч сынашырга җыйналганнар иде.Халык иҗатына багышланган күргәзмәдә фестиваль-бәйгенең  район этабында җиңү яулаган укучыларыбызның,педагогларыбызның, иҗади гаиләләребезнең эшләре урын алды.Зона этабында җиңү яулаган эшләребез,чыгышларыбыз бәйгенең республика этабында катнашачак.Барыгызга да җиңүләр юлдаш булсын!

3 апрель көнне “Ел укытучысы - 2018”, “Ел тәрбиячесе - 2018”, “Ел сыйныф җитәкчесе - 2018” “Ел педагог-оештыручысы - 2018”, “Ел өстәмә белем бирү педагогы - 2018” ,“Ел педагог-психологы - 2018” Республикакүләм бәйгенең муниципаль этабы җиңүчеләрен, лауреатларын бүләкләү тантанасы уздырылды.Киләсе уку елында район этабында җиңү яулап, “Ел укытучысы”, “Ел сыйныф җитәкчесе” исеменә лаек булучыларга 50шәр,үз юнәлешләре буенча җиңү яулаган педагогларга 25әр мең сум күләмендә акчалата бүләкләр дә вәгъдә итеп, Башкарма комитет җитәкчесе Энгель Нәвап улы укытучыларны сөендерде.Бу мәртәбәле танатанада Актаныш балалар иҗат үзәге өстәмә белем бирү педагоглары -бәйгенең район этабы җиңүчеләре- Муратова Миләүшә,Акмалова Разифә бүләкләнделәр.

Хабибулина Рифа Рифхат кызы мәктәпкәчә яшьтәге балалар белән “Җиләкле алан” темасына әти-әниләр өчен ачык шөгыль үткәрде.Кече яшьтәге балаларга  тозлы камырдан зурлыкларын саклап, төрле предметлар ясау күнекмәләре бирү белән беррәттән, эшне пөхтә һәм эзлекле итеп башкарырга да өйрәтә ул.Төсле буяулар белән бизәп эшне тәмамлап куярга да онытмый балалар.Кече яшьтән бирелгән күнекмәләр мәктәпкә әзерлекле килергә зур этәргеч булып тора. Әти-әниләр балаларның түгәрәктәге шөгыльлләренә теләп катнаштылар.