Кыш бабайда кунак булуыбызның соңгы көне. Шулай да безгә һич кенә дә күңелсезләнеп утырырга туры килмәс.Кышкы Сабантуй уздырасы, Яңа ел җырлары сайлыйсы бар. Зарядка ясап, сәламәтлек турында әңгәмә уздырганнан соң, итәнге линейкада лагерьны ябу тантанасы турында да фикер алыштык.

  Кышкы Сабантуй җәйгесеннән бик  азга гына аерылгандыр. Кыш бабайның зур залында Яңа ел бүләкләре кисәргә дә, чүлмәк ватарга да, капчык киеп йөгерергә дә, кашыкка йомырка салып чабарга да, таяк тартышырга да, скакалкада сикерергә дә мөмкин булды. Йөгерүдә Илүзәгә, чабуда Ләйләгә, таяк тартышуда Рәзилгә, скакалка сикерүдә Раниләгә тиңнәр табылмады.

Ә менә “ Яңа ел җырлары” хит-парадында малайлар өлгерлек күрсәтте. Яңа ел турындагы җырларны кайдан гына табып бетергәннәр дә, ничек матур итеп өйрәнгәннәрдер. Әлбәттә, хит-парадта беренче урында Кыш бабай, Яңа ел турындагы җырлар булды.

   Лагерьны ябу тантанасына җыелдык.Кыш бабайда кунакта булу көннәре бик тиз үтеп китсә дә, хәтердә сакланырлык булды. Тик Кыш бабай гына кызганыч: аңа бездән башка бик күңелсез булыр инде. Бабакай, һич кенә дә күңелсезләнмә-кышкы каникуллар башлану белән без тагын сиңа кунакка киләчәкбез! Сау бул, утрау! Сау бул, Кыш бабай!

Бүген сәяхәтебезнең 6нчы көне. Урамда салкын кыш хакимлек итә. Иртәнге зарядка һәм ашап алганнан соң укытучыбыз Алсу Фарил кызы круиз картасы белән таныштырды. Бүген без “Кошларга ярдәм итик!” исемле проект эше башкарырга тиеш икәнлегебезне белдек. Һәрберебез Сингапур структураларын кулланып, башкарган проект эшебез бик уңышлы килеп чыкты.

           Бию марафонына юкка гына “Кышкы фантазия” исеме куелмаган икән. Кызлар фантазиясенә исең китәр: киемдәге бизәкләр дисеңме, чәчләр дисеңме, бию төрләре дисеңме... Кыш бабай да түзмәде. Аларга ияреп биеп китте.

      Карагыз әле, ни хикмәт! Балаларның кулларында китап! Кайсы шигырь укый, кайсы кызыклы мәзәкләр, хикәяләр! Бүген бит китап укучылар көне. Һәркайсы үзенең яраткан китабын дусларына тәкъдим итәргә әзерләнә.Утрау законнары буенча ашап алдык. Ә төштән соң китапханәче Клара апа белән очрашу булды. Ул  “Сугыш чорында-язучылар” исемле презентация тәкъдим итте. Китапханәче белән караган презентация буенча фикер алышу үткәрдек, үзләрен кызыксындырган сорауларын бирдек,  күп мәгълүмат алдык. Шулай ук китапханәдә булган яңа китаплар күргәзмәсе белән таныштык. Клара апа үзенең киңәшләрен бирде, балаларның сорауларын җавапсыз калдырмады. Күп белер өчен, китап белән дуслыкны ныгытырга кирәклегенә инандык.

Чана алдык кулларга,

Киттек чана шуарга.

        Их, рәхәт тә соң тауда чана шуулары! Беребез дә туңмый. Вакыт үткәне сизелмәде дә. Кайтыр вакыт та җитте.

Сәяхәтебезнең 6 нчы көне дә узып китте. Бик күңелле булды!

Сәяхәтебез күңелле генә дәвам итә. Иртән девизларны, речёвкаларны әйтеп, рапорт бирдек. Физрук Рамиль абыебыз ясаткан гимнастик күнегүләрдән соң линейкага бастык, сәламәтлегебезне ныгытып алдык. Бергәләшеп лагерь почмагын җиһазлаганнан соң безгә тагын да уңайлырак булып китте.

   Иртәнге аштан соң укытучыбыз Гүзәлия Рәфкать кызы безне авылыбызның тыл ветераны Хәкимова Фәния әби белән бик файдалы очрашу үткәрде. Фәния әбинең сөйләгәнен бик игътибар белән тыңладык, аңа үзебезнең сорауларыбызны бирдек. Ветеранны озаткач, Круиз картасы буенча утравыбызда “Рекордлар көне” оештырылды. “Рекордлар көне” төрле уеннар белән үрелеп алып барылды.

   Ә менә төштән соң чаналарыбызны алып без киттек тауга чана шуарга. Көн салкын булуга карамастан, без рәхәтләнеп тау шудык, битләребезне кызарттык. Кайткач шашка, шахмат ярышы уздырдык. Шашка ярышында малайлар арасында Хәйруллин Ренат, кызлар арасында Таҗиева Айзилә җиңүче булды. Укытучыбыз сугыш  җырларын тыңлатты, таныш булганын бергәләшеп җырладык.Көн узганын сизми дә калганбыз.

 Һәрвакыттагыча йокыдан яхшы кәефләр белән уянып, зарядка ясап алганнан соң сәламәтлекне саклау һәм ныгыту турындагы белемнәребезне баеттык . Укытучыбыз Ләлә Альбек кызы белән иртән “ Җиңү килде җирне нурга күмеп” исемле презентация карап, фикер алыштык.

   Бүген шулай ук мөһим көн. Без Кыш бабайга кул эшләренә ничек оста булганыбызны раслап бирергә тиешбез.Шуңа ашыга-ашыга “Кыш бабай остаханәсе”нә ашыктык. Кызлар кайсы чигә, кайсы бәйли, ә кайберләре кәгазьдән аппликация ясый. Ә менә Фәннур төсле картон, мамык кулланып, Кыш бабайның үзен ясап бирде, Илүзә, Айзилә, Ләйлә җептән хәтта чыршы ясап куйдылар. Кул эшләребезне тезеп куйгач, кыш бабай үзе дә шатланды, безне мактады.

     Кыш турындагы әкиятләрне без бик яратып укыйбыз. А.Алишның “ Куян кызы” әкиятен үзебез дә уйнап карарга булдык. Әкиятне сәхнәләштерүдә барыбыз да бик актив катнаштык. Куян кызын-Ранилә, әнисен-Зилә, тиеннне-Азалия, доктор Айболитны-Әнис бик оста уйнап чыктылар. Тамашачылар һәм Кыш бабай бик озаклап алкышладылар.

 Ә менә төштән соң урамда саф һавада булдык, чана, ледянкада шудык. Вакыт узганы сизелми дә. Урамнан Кыш бабай утравына кайткач, бер-беребезгә карап көлешеп алдык, чөнки кыяфәтләребез бик матур иде. Тау шуып кайткач өстәл уеннары уйнап алдык. Ялыбыз бик күңелле уза.

Сәяхәтебез дәвам итә. “Кыш бабай” утравы гөрләп тора. Кем генә, нәрсә генә эшләми.

  Иртәнге рапорт, зарядкадан соң без эшебезне дәвам иттек. Иртәнге аштан соң безгә зур яңалык җиткерделәр- бүген безне Әтнәгә Кар шәһәрчегенә алып барачаклар. Автобуска утырып, ледянкаларыбызны алып, юлга кузгалдык. Әй, күңелле дә үтте соң вакытыбыз. Их, рәхәт тә соң тауда чана шуулары! Артта кар бураннары тузгый. Кайсыбыз чанадан егылып төшеп кала. Битләребез салкыннан алсулана. Тик беребез дә туңмый. Вакыт үткәне сизелми дә. Кайтыр вакыт та җитте. Бер-беребезнең өсләрендәге карны кагып кайтырга кузгалдык.

 Яңа ел бәйрәменә безгә зур сюрприз ясаганнар. Без җитәкчеләребезгә бик зур рәхмәтле.

 Төшке аштан соң без “Мистер Кар бабай” бәйгесенә әзерләнә башладык. Бәйгенең этаплары:

   1.Үзебез турында үзебез.

   2. Сугыш чорындагы шагыйрьләрнең шигырләрен сәнгатьле уку.

   3.Реклама тәкъдим итү.

   4. “Бу язучыны таныйсыңмы?”(язучының тулы исем- фамилиясен әйтү, таныш әсәрләрен санау)

   5.Концерт номерлары.

 Бәйге кызыклы һәм мавыктыргыч булды. Әмма катнашучылар сер бирмәде. Мистер Кар бабай булып Шакиров Әнис танылды. Соңыннан Кар кызлары сюрприз ясадылар. Алар бәйгедә катнашучылар өчен концерт куйды.

Сәяхәтебез дәвам итә. Девиз, речёвкаларны әйтеп, гимнастик күнегүләр ясап алдык. Гадәттәгечә, линейкага бастык, сәламәт яшәү рәвеше һәм спорт турында әңгәмә кордык.

   Иртәнге аштан соң без “Мисс Кар кызы” бәйгесенә әзерләнә башладык. Бәйгенең этаплары:

   1.Үзебез турында үзебез.

   2.Кием тәкъдим итү.

   3.Причёска.

   4.Сорауларга, табышмакларга җавап бирү.

   5.Концерт номерлары.

   Бәйге “Эх сез матур, Кар кызлары” исеме астында малайлар концерты белән аралаштырылып алып барылды.

  Безнең җиңүчебез-Хәйруллина Ранилә.