Тиздән, 15-июль көнне авылыбызда “Мөселман сабантуе”. Әзерлек эшләре күптән башланды инде. Һәркем көченнән килгәнчә эш башкара. Һәммәгезне бәйрәмгә чакырабыз, килегез, безнең белән бергә күңел ачыгыз, ял итегез.

Тиздән, 15 нче июль көнне авылыбызда “Мөселман сабантуе”. Шуңа әзерлек максатыннан, 7 июль көнне “Әрәпә” җыйдык. Һәммәгезне бәйрәмгә чакырабыз, килегез, безнең белән бергә күңел ачыгыз, ял итегез.

Лагерьда көн саен күңелле вакыйгалар булып кына тора. Бүген без, мәктәбебездә озынайтылган көн группасында тәрбияче булып эшләгән Ахметханова Вәсимә апаны юбилее белән котладык. Концерт номерлары әзерләп өенә бардык.
Вәсимә апай! Сезне 50 еллык юбилегыз белән тәбриклибез. Сезгә озын гомер, бәхет-шатлыклар, җан тынычлыгы, тән сихәте, саулык-сәламәтлек телибез. Кайгы-хәсрәткә бирешми, һаман шулай көчле рухлы һәм ярдәмчел, изге күңелле, балаларыңның һәм оныкларыңның игелеген күреп озак яшәргә насыйп булсын. Рәхмәтләргә һәм рәхәтләргә төренеп яшәгез.
Сиңа насыйп булган бәхет, шатлык, Якты көннәр мәңге үтмәсен. Сәламәтлек – ярты бәхет, диләр, Шунысы бигрәк читләп үтмәсен. Бәхет чишмәләрең мул аксын, Зур шатлыклар белән таң атсын. Иң изге теләкләр белән Бөрбаш урта мәктәбе коллективы.

Мәктәбебезне тәмамлаган 3 егет hәм 4 кызның 2018 нче елгы чыгарылыш кичәсе тантаналы, шау-гөр килеп узды. Никадәрле хатирә, котлау hәм күңелле мизгелләр!.. Әлеге тантаналы бәйрәмдә беренче укытучылары, әти-әниләре, мәктәп директоры, сыйныф җитәкчеләре исеменнән әйтелгән кайнар котлау теләкләре җыр, тамаша белән үрелеп барды. Чыгарылыш кичәсе hәркем күңелендә онытылмас бер истәлекле көн булып калыр. Алга таба уңышлар гына юлдаш булсын аларга!

Буген лагерьныӊ ябылу тантанасы. Укучыларыбыз үзләренеӊ сәнгать ягыннан осталыкларын матур җырлары, биюләре, нәфис сүзләре аша күрсәтте. Укучыларга истәлекле бүләкләр тапшырылды

22 июнь- Хәтер көне. Моннан 77 ел элек Бөек Ватан сугышы башлана. Менә шул уңайдан мәдәният хезмәткәрләре сугыш ветераны Нурҗиһан апа белән очрашу үткәрделәр. Аның сөйләгәнен күз яшьләрсез тыңлап булмый. Сугыш афәтләре күрергә язмасын.

Авылыбызда бердән- бер сугыш ветераны Нурҗиһан апа гына калды. Аны Бөек Җиңүнең 73 еллыгы уңаеннан котлап медаль тапшырылды. Нурҗиһан апага сәламәтлек, озын гомер, тыныч, мул тормыш телибез.

Бүген лагерьда бик күңелле булды. Табигатькә чыгып кызыклы уеннар уйнадык. Тәрбиячеләребез пешергән коймак белән чәй эчү көнебезгә тагын да ямь бирде.

Бүгеннән чын җәй башланды. Тәмле аштан соң табигать кочагына экскурсиягә бардык. Басудагы игеннәрне күзәттек. Авылыбыз гүзәллегенә сокландык. Төшке аштан соң “Агулы үләннәр” турында әңгәмә уздырдык. Бөҗәкләр тешләгән очракта беренче ярдәм күрсәтүне өйрәндек.