17 нче июнь көнне мәктәп һәм авыл музейларына экскурсия оештырылды, “Җырлыйк әле”, “Ай, күңелле биюләр!” исемле күңелле чаралар үтте, хәрәкәтле уеннар уйналды.

 Бүген район үзәгенә оештырылган экскурсия вакытында укучылар музейларда, китапханәдә булдылар. Очрашулар, экскурсияләр  вакытында үзләренә бик күп файдалы мәгълүматлар алдылар.

   Иртәнге аштан соң әкиятләр марафоны кысаларында, “Мин яраткан әкият” конкурсы үткәрелде. Ә аннан соң - велосипедчылар ярышы. Ярышта барлык укучылар да актив катнашты.

   14 нче июнь көнне “Кояшкай”лагерена йөрүче укучыларга хезмәт тәрбиясе бирү максатыннан, техника паркына һәм фермага экскурсияләр оештырылды. Ә көндезге аштан соң саф һавада уеннар уйналды. Көн бик файдалы һәм күңелле үтте.

   Бүген лагерьның унберенче көне. Линейкада отряд рапортлары тыңланды һәм көн тәртибе белән таныштырылды. Иртәнге аштан соң үткәрелгән “Исемең матур, кемнәр куйган?” дип исемләнгән кичә бик күңелле булды.Укучылар үзләренең исемнәренең мәгънәләрен аңлаттылар, исемнәргә багышланган җырлар җырладылар, шигырьләр сөйләделәр. Ә көндезге аштан соң “Бал бәйрәме” булды.Укучылар авылыбызның  Ак әбисе – Сабирова Фәүзия әби белән очрашуга бардылар. Ул озак еллардан бирле үз хуҗалыгында умартачылык белән шөгыльләнә. Фәүзия әби укучыларга умартачылык серләрен сөйләде, укучыларны кызыксындырган сорауларга җаваплар бирде. Ә соңыннан барыбызны да тәмле бал һәм чәй белән сыйлады.

   Бүген “Россия көне” уңаеннан, асфальтта рәсем ясау конкурсы үткәрелде.

   Бүген укучыларыбызның хәрәкәт активлыгын үстерү максатыннан, табигатьтә хәрәкәтле уеннар уйналды.

   Безнең туган авылыбызның табигате бик бай. Урманнары, таулары дисеңме, инешләре, чишмәләре дисеңме-барысы да авылыбыз янәшәсендә генә. Бүген без, ягъни, “Кояшкай” лагеренда ял итүчеләр, урманга сәяхәткә бардык. Урман һавасының сафлыгы, кошлар сайравы, андагы чәчәкләрнең матурлыгы – нәкъ әкияттәгечә. Без табигатьнең матурлыгына сокланып, саф һавада булып, көч туплап кайттык.

    Менә көтеп алынган көн дә килеп җитте. Бүген без иртәнге аштан соң, зур, уңайлы автобуска утырып, Казан шәһәренә сәяхәткә кузгалдык. Казаныбыз белән танышып, аның истәлекле, тарихи урыннарында булып, хозурланып кайттык. Безгә шундый мөмкинлек тудырганнары өчен барлык җитәкчеләребезгә укучылар һәм әти-әниләр исеменнән олы рәхмәтебезне җиткерәбез. Рәхмәт Сезгә!