Бакчабызда язның беренче бәйрәме 8 Март-Халыкара Хатын-кызлар көне уңаеннан бәйрәм иртәләре башланып китте. Балалар үзләренең матур шигырьләре, җырлары, биюләре белән әниләрен, әбиләрен, дәү әниләрен, апаларын, сеңелләрен котлыйлар. Без дә аларның котлауларына чын күңелдән кушылабыз - ныклы сәламәтлек, бәхет, һәр башлаган эшегездә зур уңышлар теләп калабыз.

Умырзая сафлык бүләк итсен!

Яз кояшы сипсен җылылык!

Март җилләре өмет бүләк итсен

Күңелегезне назлап торырлык!

БӘЙРӘМ БЕЛӘН!!!

Ниһаять, күп кенә сайлап алу турлары үтеп, "Йолдызлык - 2016" эстрада сәнгате фестиваленең район этабы тәмамланды. Район мәдәният йорты сәхнәсе кечкенә йолдызчыклардан балкып торды. Ә бакчабыз йолдызчыклары үзләренең югары әзерлекләре, сәхнәдә үзләрен иркен тотулары, чын артистлар кебек оста чыгыш ясаулары белән аерылып тордылар. Аларның тырышлыгын жюри да югары бәяләде. Нәни йолдызчыкларыбызны чын күңелдән әлеге зур уңышлары белән тәбрик итәбез! 

Бүген бөтендөнья песиләр көне. Песи - балаларның иң яраткан йорт хайваннарының берсе. Шуңа күрә бу кызыклы датаны без читләп үтә алмадык. Кечкенәләр төркеме балалары белән мәчеләр турында кызыклы шигырьләр укып, "Песи һәм тычканнар", "Ялкау мәче" кебек хәрәкәтле уеннар уйнадык. Ә зурлар һәм мәктәпкә әзерлек төркеме балалары белән песиләр тормышыннан күп кенә кызыклы мәгълуматлар турында сөйләшеп әңгәмәләр оештырдык.

Үзенең кар-бураннары, салкын көннәре белән ап-ак карлы кыш айлары үтеп тә китте. Кышның соңгы көнендә бу ел фасылы турында белгәннәрен гомумиләштерү максатыннан балалар белән тематик әңгәмәләр үткәрелде. Кыш ае, кышкы уеннар турында яттан өйрәнгән шигырьләр янә бер тапкыр хәтердә яңартылды.

Меңнәр авылы балалар бакчасы коллективы бүген район балалар бакчалары мөдирләрен "ФДББС шартларында УМК материаллары кулланып мәктәпкәчә яшьтәге балаларны грамотага өйрәтү"темасы астында узган киңәшмәгә җыйды. Мөдирләр һәм өлкән тәрбиячеләр балаларга тәрбия  һәм белем бирүдә алда торган проблемаларны уртага салып сөйләшеп фикер алыштылар.

Бүген 4нче балалар бакчасы базасында рус теле тәрбиячеләренең район методик берләшмәсенең чираттагы утырышы булып узды. "Рус халык мәдәнияты белән таныштыруда халык авыз иҗаты" темасы астында тәрбиячеләр эшчәнлекләр карап фикер алыштылар. Бакчабызның рус теле тәрбиячесе Сабирова Эльвира Рафис кызы да әлеге чарада катнашып үзенә бай мәгълумат туплап кайтты.

"Сәламәт тәндә - сәламәт акыл" гыйбарәсенең асылын бакчабыз хезмәткәрләре яхшы аңлый. Шуңа күрә районда үткән спорт чараларыннан читкә калмаска тырышалар. Бүген дә Ватанны саклаучылар көне уңаеннан Дәүләт Думасы депутаты Гильмутдинов И.И. призына үткәрелгән чаңгы ярышларында актив катнаштылар.

Кадерле әтиләребез, абыйларыбыз һәм дәү әтиләребез! Сезне чын күңелебездән 23нче февраль - Ватанны саклаучылар көне белән тәбрик итәбез! Сезгә озын гомер, нык сәламәтлек, бәхет, шатлыклар телибез! Изге бурычыгызны үтәп илебез тынычлыгын саклауда керткән өлешегез өчен сезгә рәхмәт әйтеп алдыгызда баш иябез.

Тыныч көннәрне бүләк итүче,

Илебез данын бөек йөртүче

Әтиләрдә бит туган ил көче!

Тәрбияче Шарапова Фәрсия Фәһим кызы зурлар төркемендә юл йөрү кагыйдәләрен ныгыту буенча театральләштерелгән күңел ачу тәкъдим итте. Балалар бик теләп бер тапкыр да шәһәр күрмәгән аю, төлке, бүрегә юл йөрү кагыйдәләре өйрәттеләр, светофор сигналларын танырга ярдәм иттеләр. Күңел ачуда катнашкан әтиләргә дә төрледән-төрле биремнәр үтәп, белемнәрен камилләштерергә туры килде.

Бүген безнең балалар бакчасында "Ел тәрбиячесе - 2016" конкурсының район туры үтте. Сайлап алу турын үткән иң тәҗрибәле 15 тәрбияченең сигезе балалар белән эшчәнлек күрсәтте һәм үз-үзләрен яклап тәҗрибә белән уртаклашты. Ә калган җиде тәрбиячене иртәгә 6нчы санлы "Каенкай" балалар бакчасында нәкъ шундый ук сынау көтә. Аларның барысына да иҗади уңышлар теләп калабыз!