Бүген   төшке ашка кадәр "Табышмаклар кичәсе" уздырдык. Әлеге кичәдә тапкырлык-зирәклекне сынарга бирелгән табышмаклар, кызыклы сорауларга җаваплар эзләдек, арабыздан иң тапкыр, иң зирәк укучыларны ачыкладык. Төшке аштан соң янә Актаныштагы бассейнга барып, рәхәтләнеп суда йөзеп, ял итеп  кайттык.

    "Солнышко" һәм "Мушкетёры" отряды укучылары арасында бүген "Дөньяга балалар күзеннән" исемле рәсем конкурсы һәм татарча караоке оештырылды. Рәсем конкурсында "Солнышко" отряды укучылары, ә караоке вакытында "Мушкетёры" отряды укучылары җиңүче булды.

    Бүген лагерьга йөрүче укучылар өчен икенче тапкыр бассейнга экскурсия оештырылды. Суда йөзгәндә куркынычсызлык кагыйдәләре буенча янә инструктаж үткәрелде. "Иң ерак арага йөзүче", "Иң тиз йөзүче" ярышлары оештырылды.

     Бүген шулай ук үзебез өчен янә бер кызыклы уен таптык-барыбыз да "Аквагрим" уенына кушылып, бер-беребезнең һәм үзебезнең бит-йөзләребезне пиратларга охшатып буядык. Әлеге шөгыль барыбызга да бик ошады, истәлеккә фотога да төштек.

    Ел дәвамында оештырылган "Туган ягыбыз буйлап" телдән сәяхәт бүген чынбарлыкта дәвам итте. Укучылар туган ягыбызның табигате, аның флорасы һәм фаунасы белән танышу өчен якындагы урманга экскурсиягә бардылар. Экскурсия алдыннан укучылар өчен куркынычсызлык кагыйдәләре янә искәртелде.

    Бүген лагерьга йөрүче укучылар өчен кече сабантуй оештырылды. Кызыклы ярыш төрләренә саллы бүләкләр дә әзерләнгән иде. Сабантуй бәйрәмгә кагылышлы шигырьләр, җыр-биюләр белән үрелеп барды.Сабантуйда беркем дә бүләксез калмады.

     Бүген без мәктәбебез ишегалдындагы асфальтка иң матур рәсем ясаучыны ачыкладык. Рәсемнәрне һәркем кулыннан килгәнчә тырышып, матур итеп ясады. Нуретдинов Булат  ясаган рәсемнәр иң матуры дип табылды һәм бүләккә ия булды.

     Мамадыш шәһәрендә үткәрелгән Россия IX Махсус Олимпиадасының республика этабы ярышларында 7 класс укучысы Латыйпова Айсылу армрестлинг буенча үз авырлыгында 2 урынга лаек булды. Айсылуны һәм укытучысы Хазиев Алмаз Сәяф улын әлеге җиңүләре белән котлыйбыз, алдагы ярышларда да сынатмыйча, яңа үрләр яулауларын телибез!

      Бүген мәктәбебезнең "Очкын" исемендәге җәйге ял һәм сәламәтләндерү лагерын ачу тантанасы булды. Тантаналы линейкада "Улыбка" һәм "Мушкетёры" командалары калганнарга үзләренең речёвка, девиз һәм җырларын тәкъдир итеп, әзерлекләрен күрсәттеләр. Отряд командирлары лагерь флагын күтәрделәр.Линейка вакытында мәктәп директоры  А.С.Хазиев үзенең котлау сүзеннән соң пионерлар лагеры турында сөйләп үтте һәм төп атрибутикаларыннан берсе булган пионер быргысын чакыру авазы буларак ничек яңгыравын күрсәтте.

     Бүген төшке аштан соң лагерьга йөрүче укучылар өчен Актаныш иҗат үзәгендә урнашкан бассейнга экскурсия оештырылды. Бассейнда эшләүчеләр безне бик җылы кабул иттеләр. Иң элек куркынычсызлык кагыйдәләре аңлатылды , бассейнга керер алдыннан сан-гигиена кагыйдәләре үтәү зарурлыгы кисәтелде һәм шуннан  йөзәргә рөхсәт бирелде.  Суда йөзгәндә вакыт сизелми дә үтте, тагын килергә сөйләшеп, мәктәбебезгә кайттык.