Хөрмәтле коллегалар!

Сезне 23 нче февраль - Ватанны саклаучылар көне белән котлыйбыз! Сезгә озын гомер, нык сәламәтлек, эшегездә зур уңышлар телибез.

   Яшәрегез яшь өстәлгән саен,

Яшәү булсын сезгә күңелле.

Безнең өчен ныклы терәк бит сез

Иң зур бәхет шушы түгелме?

  Ходай сезгә камил акыл бирсен,

Җиткерәбез сезгә теләкне

Олы бәйрәмегез уңаеннан

Кабул итегез сез рәхмәтне.

Мәктәбебездә  "Ватан терәге - ир-егет" исеме астында Ватан саклаучылар көненә багышланган бәйрәм концерты булды. Чарада Әфган сугышында катнашкан якташларыбыз катнашты. Алар үзләре үткән дәһшәтле еллар турында сөйләделәр, үсеп килүче яшь буынга үзләренең теләкләрен җиткерделәр. 8 нче класс җитәкчесе Миләүшә Радиковна җитәкчелегендә укучыларыбыз башкарган җырлар, биюләр  һәркемне дулкынландырды. 

19 нчы февраль көнне мәктәбебездә "Хәрби-патриотик җырлар" бәйгесе үтте. Бәйгедә 1-9 нчы класс укучылары катнашты. Укучылар ике номинациядә хәрби-патриотик җырлар тәкъдим иттеләр. 1-4, 7, 9 нчы класс укучылары 1 урын, 5, 6, 8 нче класс укучылары 2 урын алдылар. Укучыларның сайлаган эчтәлекле, матур җырлары һәркемнең күңеленә хуш килде. 

19 нчы февраль конне “Халыкара туган тел көне” уңаеннан татар теле һәм әдәбияты укытучысы А. М. Җамалиева 5-8 сыйныфларга “Җыр булырлык сүзләр биргән, Туган телем, рәхмәт сиңа!” дип исемләнгән тәрбия сәгате уздырды.

7 класс укучысы Гайфуллина Диләрәне татар теленнән республика олимпиадасында уңышлы гына катнашып кайтуы белән чын күңелдән котлыйбыз, алга таба да зур уңышларга ирешүен теләп калабыз. Укытучысы Г.Р.Җәләлетдинова.

6 класс укучылары “Афганчылар кемнәр алар?” дигән тема астында тәрбия сәгате уздырдылар.Үзебезнең авылдан киткән афганчылар, аларның батырлыклары  турында да  фикер алыштылар

Бүген укучыларга татар теле һәм әдәбияты укытучысы А. М. Җамалиева тарафыннан Муса Җәлил турында  "Моабит дәфтәрләре" исемле фильм күрсәтелде. Фильмда батыр шагыйребезнең туган илне, газиз халкын сатмас өчен күпме газаплы көннәр кичерүе, дошман алдында сер бирмәве ачык чагылды. Соңыннан шагыйрь иҗаты буенча викторина сораулары тәкъдим ителде.

Китапханәче Ф. Р. Ахмадуллина тарафыннан М. Җәлил китаплары, аның турында язмалар чыккан газета-журналларга күзәтү ясалды. Шулай ук китаплар күргәзмәсе оештырылды. 

15 нче февраль көнне Иске Кишет мәктәбендә М.Җәлилнең 110 еллыгына багышланган тәрбия сәгате үткәрелде. Укучылар Советлар Союзы Герое Муса Җәлил турында күп мәгълумат алды. Аның көрәштәшләре белән таныштылар. Соңыннан укучылар М.Җәлил шигырьләрен яттан сөйләделәр.Тәрбия сәгате М.Җәлилгә багышланган презентация аша үткәрелде.
--