Табигатькә һәм кошларга карата мәхәббәт һәм җаваплылык хисләре тәрбияләү, кошлар тормышыннан кызыклы мәгълүмат белән балаларның белемнәрен арттыру максатыннан мәктәбебездә "Кошларга ярдәм ит!" акциясе уздырылды. Әлеге акция кысаларында әтиләр тарафыннан сыерчык оялары ясалып, мәктәбебез террияториясендәге агачларга эленде. Канатлы дусларыбызга ярдәм итүдә катнашкан барлык әтиләребезгә зур рәхмәтебезне белдерәбез.

    29 март көнне Казанның 81 нче мәктәбендә XVII Регионара Каюм Насыйри укулары булып узды. Әлеге укуларда мәктәбебезнең 9 нчы сыйныф укучысы Шәмсемөхәмәтова Гөлшат ( җитәкчесе Сәгыйдуллина Ч.Р.) үзенең "Кесмәсебез - суыбыз" исемендәге тикшеренү эше белән уңышлы чыгыш ясап, грамота белән бүләкләнде. Укучыбызга чыгарылыш имтиханнарында да уңышлар телибез!..

   Мәктәбебездә укытучыларыбыз сәләтле балалар белән эшләүгә зур игътибар бирәләр. Бу эш белем бирү, сәнгать,  спорт юнәлешләрендә алып барыла. Спорт-укучыларның иң яраткан шөгыле. Мәктәпнең спорт залы балалар өчен һәр көн ачык, анда шөгыльләнү өчен мөмкинлекләр : спорт инвентаре, маталар, туплар җитәрлек,  теннис  өстәле укучылар өчен хезмәт итә. Мәктәптә туризм, көрәш, волейбол түгәрәкләре эшли.

      Бүген мәктәбебездә чираттагы педагогик киңәшмә уздырылды. Киңәшмәдә 3 чирек нәтиҗәләре, төп дәүләт имтиханнарына һәм Бөтенрәсәй тикшерү эшләренә әзерлек торышы, җәйге ялны оештыру мәсьәләләре каралды. 

      Сикертән мәдәният йорты каршында “Сердәш” халык театры эшләп килә.Театр елы уңаеннан бу коллектив Т.Миңнуллинның “Ай булмаса, йолдыз бар” исемле драмасын өйрәнеп, халыкка җиткерделәр. 27 нче мартта, театр көнендә, спектакльне Арча мәдәният йорты сәхнәсендә куеп, райондашларыбызны таң калдырдылар. Үзешчән артистларыбыз арасында мәктәбебезнең 9 нчы сыйныф укучысы Шәмсемөхәмәтова Гөлшат та бар!

      Спектакльдә катнашучыларның һәрберсенә район Мәдәният йорты тарафыннан  “Рәхмәт хаты” тапшырылды.

    Сәнгати-эстетик яктан балаларның һәм яшүсмерләрнең иҗатын үстерү максатыннан Арча районы мәдәният йортында “Без бергә” республикакүләм яшь талантлар фестиваль – конкурсының гала концерты булып узды. Әлеге чарада укучыларыбыз Гобәев Рәдис һәм Камалова Диләрә катнашты. Укучыларыбыз бию өлкәсендә 3 дәрәҗә лауреат булдылар. 

           Гөберчәк авыл клубында Нәүрүз бәйрәме үткәрелде. “Нәүрүз” сүзе фарсыча “яңа көн” дигәнне аңлата. Урта Азиядә, Иранда, Әфганстанда һәм һәм кайбер илләрдә бик борынгыдан  килгән Яңа елны каршылау бәйрәме ул. Нәүрүз көн белән төн тигезләшкән чорга туры килә. Бу бәйрәмдә клуб мөдире Әхмәдиева Халидә Мөхәммәтнур кызы җитәкчелегендә мәктәбебез укучылары актив катнашты.

   23 март көнне 2003-2005 нче елгы егетләр арасында  "Ак Барс"агрокомплексы" җитәкчесе Салахов Ш.И. район буенча көрәш ярышлары уздырды.  Бу ярышларда  8 сыйныф укучылары Кәримов Инсаф 1 урынны, Сафин Илназ  3 урынны яуладылар. Тренерлары  Ахмадеев М.Г. ны, көрәшче егетләрне җиңүләре белән котлыйбыз, 

             Март - яз башы, бик матур ай. Бу ай озак заманнар яңа елның беренче ае булып йөргән. Нәүрүз -  язны каршылап, язгы чәчү эшләре алдыннан үткәрелә торган халык бәйрәме ул. Мәктәбебездә Нәүрүз бәйрәме шаулап, гөрләп үтте. Кыш бабай эстафетаны Нәүрүзбикәгә тапшырды. Нәүрүз ул - тынычлыкка, матурлыкка өндәүче бәйрәм.

Хуш киләсең, гүзәл Нәүрүз!-

Язгы яңа елыбыз,

Яңа елда туры булсын,

Нурлы булсын юлыбыз!