Рус теле эшчәнлегендә зурлар төркеме балалары тәрбиячеләре Гөлфия Хәйдәровна белән "Гаилә чәчәге" ясадылар.

Үзебезнең туган авылыбызны, аның эшчән кешеләрен, ямьле табигатен яратабыз. Авыл тагы да матур, кешеләре шат булсын өчен аның табигате чиста булырга тиеш. Авылыбызда яшәүчеләр моның өчен күп көч куялар, ә без - нәни экологлар моңа өлешебезне кертәбез. Әле бүген Камилә чишмәсенә бардык. Салкын, тәмле суы белән чишмә авылның күп кешесен сыйлый. Су аккан ерганакларны таш, үләннәрдән чистарттык.

"Минем әйләнә-тирәм" проекты кысаларында балалар әти-әниләренең һөнәрләренә кагылышлы рәсемнәр карап, аларның эчтәлеген аңларга тырыштылар. Төрле һөнәр кешеләренә, әти-әниләр хезмәтенә карата кызыксыну уяту максатыннан төрле уеннар уйнадык. Балаларга "шофер". "табибә", "сатучы" булып уйнау бик ошады.

Табигый материаллар үзеннән-үзе фантазия һәм уеннар тудыру өчен зур байлыкларның берсе. Аларга оста куллар җан өреп икенче тормыш бирә. Зурлар һәм мәктәпкә әзерлек төркеме балалары әти-әниләре белән бергәләп табигый материаллардан сокландыргыч, күңелгә рәхәтлек, шатлык бирә торган кул эшләре иҗат иттеләр. Күргәзмә искиткеч матур булды, барысы да бер-берсенең эшенә сокланып, кызыксынып карадылар, тәэсирләрен уртаклаштылар.

Бүген мәдәният йортында Бөрбаш һәм Кариле балалар бакчалары арасында "Җырлыйк әле" дип исемләнгән бик эчтәлекле, моңлы җырларга, дәртле биюләргә бай бәйрәм чарасы булды.

Нәниләр төркеме балалары үзләренең яраткан мул уңышлы Көз бәйрәмендә! Алар Сөмбелә белән рәхәтләнеп уйнадылар, күңел ачтылар.

Әлмәт курчак театры бүген Бөрбаш балалар бакчасында тәрбияләнүчеләрне сөендерде. Тәрбияви белем бирү максаты белән куелган тамашаның эчтәлеге балалар өчен бик аңлаешлы һәм кызыклы иде. Өлкәннәрдән башка су буена, урманнарга барырга, биек урыннарга менәргә, шырпы белән уйнарга ярамаганын искәрттеләр. Шундый өйрәтү-мавыктыргыч әкиятләрне Әлмәт курчак театрыннан тагын көтәбез. Аларга иҗади уңышлар телибез.

Бүген бездә "Сөмбелә" бәйрәме үткәрелде. Чәчәкле җәй моңсу гына елмаеп саубуллашты,  ә көз, киресенчә, түрдән урын алды. Сөмбелә барыбызны алтын яфракларга төренгән көз белән котлады, ел әйләнәсе тырышып эшләгәннәрне мул уңыш белән сыйлады, аларны мактады, тырышлыкларына сокланды.

Өлкәннәр декадасы уңаеннан Балтач районы башкарма комитеты тарафыннан оештырылган "Йөрәкләрдә көз" зонтик бизәү бәйгесендә I, II урынны яулаган Хөсәенов Гаделне, II урын иясе Әхмәдиев Исламны, III урын иясе Яббарова Әлфинәне, актив катнашучылар Габдрахманов Ансар һәм Галимова Зифаны җиңүләре белән котлыйбыз. Алда зур иҗат уңышлары телибез.

Өлкәннәр ункөнлеге уңаеннан төркемебездә махсус бәйрәм чарасы узды. Нәниләр төркеме балалары өлкәннәргә бәйрәм чарасы тәкъдим итте. Бөтен кешелек дөньясына ямь бирүче, елмаюлары белән безне иркәләүче, җылы карашлары белән назлаучы, акыллы фикерләре белән безгә ак юл күрсәтүче сөекле әбиләребезне, хөрмәтле өлкән яшьтәге хезмәткәрләребезне олуг бәйрәмнәре белән котладылар. Өлкән буын яшь буын белән очрашты.