Бүген мәктәбебездә әхлак укытучыларының республика семинары үткәрелде.

18 нче апрель көнне Норма урта мәктәбендә яшь авторларның шигырьләрен оста башкаручылар конкурсы үткәрелде. Мәктәбебездән 2 нче сыйныф укучысы Газизуллин Кәрим, 5 нче сыйныф укучысы Гафарова Гөлгенә, 10 нчы сыйныфтан Шәйхетдинова Илүзәләр катнашты. Алар уңышлы чыгыш ясадылар. Гафарова Гөлгенә, Шәйхетдинова Илүзә 3 нче урынга чыктылар

17 нче апрель көнне  мәктәбебезнең  “Аргамак” укучылар оешмасының  чираттагы җыелышы булып үтте.  Оешма укучылары өченче чиректә үткән эшчәнлеккә  анализ ясау максатыннан үткәрделәр  бу җыелышны. Җыелышның көн тәртибенә килгәндә башта уку министры Сәләхетдинова  Әнисә III чирек буенча чыгыш  ясады. Аннан фикер алышуларга күчеп, классларның уку секторлары үз классларының  уку юнәлеше буенча  сөйләделәр.   Икенче көн тәртибендә һәр классның старосталары  класс эшчәнлегенә анализ ясап китте.  Җыелышны “Аргамак” укучылар оешмасы президенты Хәйретдинова Гүзәл алып барды.

20 нче апрель көнне бездә зур кунаклар көтелә. Әхлак дәресләре буенча республикакүләм семинар булачак. Инде укучыларыбыз үз куллары белән ясалган бүләкләр дә әзерләп куйдылар. Рәхим итегез кунаклар, без сезне көтәбез!

“Туган тел” айлыгы кысаларында 16 апрель көнне, мәктәп күләмендә “Иң матур язучы” конкурсы  үткәрелде. Бу конкурста  5 – 10 нчы класслардан  матур язу  осталары катнашты. Конкурсы татар теле һәм әдәбияты укытучысы Зөлфирә Зөфәровна үткәрде. Ул укучыларның һәркайсына аерым текстлар бирде, укучылар шуны бик тырышып күчереп яздылар.

Район күләмендә, табигатьна саклау һәм яклау буенча үткәреләчәк  “Марш Парков – 2013” конкурсына укучыларыбыз ел саен тырышып һәм бик теләп катнашалар. Быел да укучыларыбыз инде эшләрен әзерләп куйдылар. Кемдер сочинение язган, кемдер бик матур һәм оста итеп рәсемнәр ясаган. Укучыларыбызның бу хезмәтләре эзсез калмасын иде. Матур нәтиҗәләр булсын иде. Зур уңышлар аларга!  

13 нче апрель көнне Нормада, Васил Гарифуллин призына үткәрелгән көрәш бәйгесендә Ахметзянов Хәниф II урынны яулады . Хәниф барлык көрәш бәйгеләрендз дз үз дәрәҗәсен төшерми, ул пьедесталның икенче баскычында әлегә нык басып тора. Молодец, Хәниф! Алда Сабантуйлары , зур җиңүләр сиңа!

13 нче апрель көнне  Нормада, Рамил Фазлыев истәлегенә үткән ярышта  катнашып, безнең яшь шахматчыбыз Шамил Шәйхетдинов   IV урынга лаек булды. Шахмат ярышларына әле Шамил быел гына йөри башлады. Димәк, алда өмет бар. Ул алда тагын да тырышып, тагы  да югары уңышларга ирешсен иде дигән теләктә калабыз. Әйдә тырыш, Шамил, сынатма!

12 нче апрель көнне ярминкә беткәннән соң, укучыларыбыз еллык эшкә нәтиҗә ясап, әти – әниләргә, авыл халкына бик матур концерт куйдылар. Ике сәгать буена барган концерт беркемне дә ялыктырмады, тамашачы күңеленә бик хуш килде. Концерт тәмамлангач мәктәбебез директоры  Гүзәл Галимулловна укучыларыбызга, мәктәп коллективына, аеруча әти – әниләргә рәхмәтләрен җиткерде, изге теләкләрен теләде. Ахырдан бик күп тамашачы аерым – аерым килеп үзләренең матур хисләрен белдерделәр, рәхмәтләрен  әйтеп киттеләр. Безгә дә, үз чиратыбызда аларның рәхмәтләренә  каршы рәхмәт диясебез килә.