" Созвездие - Йолдызлык - 2017"  фестивалендә мәктәбебез йолдызы, нәфис сүз остасы Гөбәева Миләүшә уңышлы чыгыш ясады. Аның чыгышын әле без гала - концертта  карый алабыз. 

Мәктәп үз эшчәнлеген уку елы башында төзелгән план нигезендә алып бара. Укучылар белән даими төрле темага әңгәмәләр үткәрелә. Чираттагы әңгәмәне тәрбия эшләре буенча директор урынбасары Шәрәфиева Л.Ә. мәктәпнең хокук бозуларны кисәтү отряды белән берлектә  "Хокук бозу нәрсә ул?" дигән  темага 5-7 нче сыйныф укучылары өчен оештырды. 

Башлангыч сыйныф укучылары 8 нче март  бәйрәменә һәрвакыттагыча, зурлап әзерләнергә ярата. Алар өчен әниләрне сөендерү, шатландыру беренче планда. Үз куллары белән бүләкләрне күптән әзерләп куйдылар инде алар. Зур түземсезлек белән бәйрәм якынлашканын көтәләр. 

Иртәнге зарядка кысаларында мәктәп укучылары «Россия мәктәп укучылары хәрәкәте» гомумроссия иҗтимагый-дәүләт балалар һәм яшүсмерләр оешмасы гимнына бию өйрәнү белән мәшгуль. 

Мәктәп укучыларының  "Аҗаган" уенына әзерлекләре зур иде. 3 командага бүленеп, алар төрле хәрби-сугышчан биремнәрне үтәде, яшерелгән “мина”, байракны эзләде, беренче медицина ярдәме күрсәтүгә кагылышлы сорауларга җавап бирде, төрле сугышчан җырлар башкарды, проектлар төзеде. Соңыннан командалар бүләкләнде.

1-9 нчы сыйныфларда Россиякүләм тыюлыклар дәресе үткәрелде. Укучылар Татарстан Республикасында урнашкан тыюлыклар турында мәгълүмат туплады. Әлеге дәресләр укучыларда табигатькә сакчыл караш тәрбияләүдә зур роль уйный. 

Кышын кошларга ничек ярдәм итәргә? Һичшиксез, беренче чиратта җимлекләр ясап элергә кирәк. Мәктәбебездә игълан ителгән җимлекләр ясау конкурсында укучыларыбыз актив катнашты. Һәм бүген моңа нәтиҗә ясалды. Һәр укучы үз җимлеген, җимнәр белән тутырып, мәктәп тирәсенә элеп чыкты. 

Мәктәбебездә бәйрәм көннәре алдыннан "Әти, әни һәм мин - спорт сөюче гаилә" ярышы үткәрелде. Ярышта спорт белән дус булган Гыйләҗевлар, Әхмәтҗановлар һәм Зәйнуллиннар гаиләләре көч сынашты. Ярыш төрләренең кызыклы, кабатланмас булуына башлангыч сыйныф укытучылары Сәйфетдинова А.М., Хәсәнова М.М. күп көч куйган. Ярыш күз ачып йомган арада үтеп тә китте. Зәйнуллиннар - 1 урында, Әхмәтҗановлар - 2 урында, Гыйләҗевлар - 3 урында. Котлыйбыз! Бергә булыйк! Күңелле мизгелләрне истә калырлык итеп үткәрик. 

Тимурчылар үзләренә билгеләнгән әби - бабайларга ярдәмнәрен кызганмыйлар. Бу арада еш кар яуды. Шуңа да ялгыз яшәүче ветераннарыбызның, тыл хезмәтчәннәренең хәлен укучыларыбыз даими белешеп тордылар. 

Һәр милләттә исеме телгә алынуга ук хөрмәт уятырлык шәхесләр була. Шундый исемнәрнең берсе олылар һәм балалар өчен бик күп әсәрләр иҗат иткән татар халкының бөек улы, Советлар Союзы герое, Ленин премиясе лауреаты, онытылмаслык бөек шагыйрь –Муса Җәлил. Юк,ул исем генә түгел,бәлки тирән мәгънәле символ да. Чөнки бу исемнең символлары булып батырлык, каһарманлык, талантлылык, тугрылык  кебек сүзләр тора. Ул чыннан да, бу сүзләрнең һәммәсенә лаек шәхес. Менә шуның өчен дә без, Җәлилнең милләтәше буларак, бу сыйфатларны яшьтән үк үзебездә тәрбияләргә тиешбез. Башлангыч сыйныф укучыларының чыгышы моның дәлиле.