15 нче февральдән 21 нче февральгә кадәр 1 нче сыйныф укучылары өстәмә каникулга киттеләр.

15 нче февраль көнне патриот - шагыйрь Муса Җәлилнең туган көне уңаеннан, тарих фәне укытучысы Ярмиева Гүзәл Мәсгут кызы 10 нчы сыйныф укучылары белән "Татар халкының курку белмәс улы" дип исемләнгән чара үткәрде. Укучылар бу чарадан туган илебезне Җәлил кебек яратырга, аңа тугрылыклы булырга кирәклеген аңладылар.

   Бүген мәктәбебезнең хоккей мәйданчыгында Саба аграр көллияте, Арташ һәм Явлаштау командалары көч сынашты. Барлык командадагы егетләр дә бик тырышып уйнадылар. Ләкин, уен җиңелүсез дә булмый. Соңгы нәтиҗәләргә килгәндә Саба аграр көллияте - I урын, Явлаштау - II урын һәм Арташ командасы - III урынны яулады. Сез булдырасыз, егетләр!

12 нче февраль көнне Балалар иҗат үзәгендә "Иң шәп әйдәман" ("Замечательный вожатый") республика конкурсының район этабы (II тур) үткәрелде. Бәйгедә районыбызның төрле мәктәпләрендә белем алучы иң актив 6 әйдәман катнашты. Әйдәман - балаларның ялын мавыктыргыч итеп оештыручы һәм һәр яктан сәләтле укучы ул. Бу сыйфатлар безнең мәктәбебезнең әйдәманы, 10нчы сыйныф укучысы Габделхакова Айгөл Айдар кызына да бик туры килә. Бәйгедә ул үзен бар яктан да үрнәк итеп күрсәтеп, "Самый эрудированный вожатый" номинациясендә җинү яулады. Афәрин, Айгөл! Алга таба да зур уңышлар сиңа. 

Бүген Явлаштау авыл җирлеге буенча "Россия чаңгы юллары - 2016" үткәрелде. Традициягә әйләнгән зур күләмле бу спорт чарасында мәктәп укучылары, укытучылар һәм хезмәткәрләр бик теләп катнашты. 

  Укучыларның белем дәрәҗәләрен өйрәнү дәвам итә. Бүген инглиз теленнән 5,6,7,8,10 нчы сыйныф укучылары өчен районкүләм контроль эш уздырылды.

   Фикерли белү, үз каләмең аша шул фикерне башкаларга җиткерү зур талант сорый. Районыбыз иҗат белән шөгыльләнүче мәктәп укучыларына да, яшьләргә дә бик бай. Яза белә торган сәләтле укучыларны барлау йөзеннән, районыбызда һәр елны Татарстанның атказанган фән эшлеклесе, филология фәннәре докторы, профессор Васил Гарифуллин тарафыннан "Серле каләм" конкурсы үткәрелә. Бу бәйгедә безнең мәктәбебез укучылары да актив катнашып, призлы урыннар яулыйлар. Шул уңайдан, 17 февраль көнне бәйгене оештыручылар катнашында, безнең укучылар белән очрашу көтелә. Очрашуга рәхим итегез!  

Парламент дәресләре Дәүләт Советы рәисе Мөхәммәтшин Фәрит Хәйрулла улы тарафыннан 2009 нчы елдан башлап үткәрелә. Бүген парламент дәресенең чираттагысы җәмгыять белеме фәне укытучысы Фәйзрахманова Нуркыя Мөхәммәтхан кызы һәм җирле үзидарә сәркатибе Балтачова Оркыя Миннегали кызы катнашында үтте. Дәрестә парламент эшчәнлеге, бурычларыбыз, хокукларыбыз турында сөйләшенде, укучыларны кызыксындырган сорауларга җаваплар бирелде.  

   Мәктәбебездә хәрби-патриотик тәрбия айлыгы бара. План нигезендә төрле чаралар, ярышлар, уеннар үткәрелә. Бүген айлык кысаларында тормыш иминлеге нигезләре фәне укытучысы Ханнанов Илдар Фәнис улы дартс буенча ярыш үткәрде.