Районда "Теле барның иле бар " дип аталган шигырь конкурсы булып узды. Анда безнең мәктәптән 9 сыйныф укучысы Сәйфетдинова Энҗе һәм 5 сыйныф укучысы Хайбуллин Рифат катнашып призлы урыннар яулап кайттылар. Һәзер алар Республикада чыгыш ясарга әзерләнәләр. Аларга уңышлар телибез.

2 сыйныф укучысы Ахметянов Азат "Әнигә открытка" дип аталган россиякүләм  дистанцион конкурсында катнашып, "Әниемә чәчәк" номинациясендә җиңеп диплом белән һәм җитәкчесе Яруллина Римма Дамир кызы "Рәхмәт хаты" белән бүләкләнделәр. 

Кеше кая гына эшләмәсен, кем генә булмасын, үзенең балачагын, нәни кулларына беренче тапкыр Әлифба алган вакытын дулкынлану белән искә ала. 9 мартта 1 сыйныфта узган "Әлифба" бәйрәме шундый сүзләр белән башланып китте. Укучылар ярты ел буена алган белемнәрен әниләренә күрсәттеләр. Әти-әниләр  укытучылары, Зарипова Роза Рафик кызына, рәхмәт әйтеп таралыштылар.

Урамда кышның җилләре иссә дә, яз исе сизелә. Бәлки яз хатын-кызлар бәйрәме белән башланганга шулай матурдыр. Ә бәлки хатын-кызлар бәйрәмен үткәрү өчен нәкъ менә шундый матур яз көнен сайлау кирәктер?  Шундый матур, ямьле яз көннәренең берсендә без мәктәптә хатын-кызлар көне - 8 март бәйрәмен билгеләп үттек.

Безгә үзенең "И моңлы Туган телем" дигән концерт программасы белән халык музыка кораллары остасы, җырчы Шигапов Солтан Фидаисович чыгыш ясады. Ул безнең балаларны татар халкының музыка уен  кораллары белән таныштырып, уйнап күрсәтте. Балалар аның чыгышын кызыксынып тыңладылар. Аның концерт программасы балаларда татар халкының культурасын тәрбияләүгә юнәлгән иде.

Биедек тә, кушылып җырладык та, шигырь дә сөйләдек без бу концертта. Чара бер тында, матур истәлекләр калдырып узып та китте.

5 мартта Казанда М.Мозаффаровка багышланган "Дулкыннар" конкурсы узды. Безнең мәктәптәп 1 сыйныф укучысы Шәмсетдинова Камилә, 5 сыйныф укучысы Хайбуллин Рифат һәм 9 сыйныф укучысы Сәйфетдинова Энҗе катнашып, акчалата бүләк һәм "Ривьера" аквапаркына билетлар белән бүләкләнделәр. Укучыларга һәм җитәкчеләргә алда да уңышлар телибез.

29 февральдә 1 нче мәктәптә "Театр яктылыкка, нурга илтә" дигән район конкурсы булды. Конкурста татар телен өйрәнүче рус һәм татар мәктәпләре катнашты. Барлыгы 10 мәктәптән 82 бала. Безнең мәктәптән дә "Энҗе бөртеге" түгәрәгенә йөрүче укучылар чыгыш ясады. Мәктәпләрнең  зур әзерлек белән килгәне күренеп тора иде. Шуңа да карамастан безнең укучылар 1 нче урынны яулап кайттылар. Укучыларга: 5 сыйныф укучылары Зарипов Булатка, Хайбуллин Рифатка, 7 сыйныф укучылары Халилова Зәринәгә, Исхакова Рәзиләгә, Гимаева Гөлнарага һәм җитәкчеләре Роза Мансур кызына зур рәхмәтебезне белдерәбез, алда да уңышлар телибез. Афәрин! 

Бүген 10 сыйныфта немец теленнән "Звездный час" дип аталган конкурс булды. 10 сыйныф укучылары немец теленнән булган белемнәрен күрсәттеләр. Конкурс эчтәлекле һәм нәтиҗәле узды. Конкурсның җиңүчесе булып Гимаева Гүзәл билгеләнде.

Патриотик тәрбия айлыгы уңаеннан мәктәптә 7-11 сыйныф егетләре арасында баскетбол, волейбол һәм мини футбол ярышлары узды. Командалар җанатарларны үзләренең җитезлекләре, өлгерлекләре белән сөендерде. Җиңүче командалар грамота белән бүләкләнделәр. Афәрин егетләр!

Бүген мәктәптә "Ватанны саклаучылар" көненә багышланган бәйрәм булды. Бәйрәмгә Әфган сугышында катнашучылар, яңа гына хәрби хезмәт сафларыннан кайтучы егетләр һәм тыл ветераннары килделәр. Ветераннар советы рәисе Гөлсирә Сәгыйрь кызы бәйрәмне башлап җибәрде. Аннан соң, С.Баттал исемендәге "Туган якны өйрәнү" музее мөдире Зарипова Лилия Дамир кызы ир-егетләрне котлады. Укучыларыбызның  котлаулары шигырь, җырлар һәм Ф.Яруллинның  "Хәзинә" дип аталган сәхнә әсәре аша  күрсәтелде. Бәйрәмебез чәй өстәле артында дәвам итте.