Акчишмә башлангыч мәктәбендә  Мәрхәмәтлелек атналыгы кысаларында мөмкинлекләре чикле укучыбыз Галәветдинов Р янында  “Шәфкатьлелек бизи кешене” исеме астында тәрбия сәгате үткәрелде. Дәрес барышында өлкәннәрнең бүгенге матур, тыныч, бәхетле тормышыбызга керткән өлешләре турында сөйләшенде, аларның сугыш вакытында күрсәткән батырлыклары, авыр, ач-ялангач балачаклары турында әйтелде. Балалар сорауларга җавап бирделәр, презентация буенча төрле ситуциядән чыгу юлларын эзләделәр. Укучылар үзләре өчен олыларны, мөмкинлекләре чикле кешеләрне  хөрмәт итәргә, кешелекле, шәфкатьле булырга, кулдан килгәнчә өлкәннәргә ярдәм күрсәтергә кирәклеге турында нәтиҗә ясадылар.

   Бүген Акчишмә башлангыч мәктәбендә Нигъмәтуллин М.К. белән очрашу булды. Ул балаларга террорчылыкка каршы көрәш турында сөйләде, балаларны тәртипле булырга, юлда йөрү, мәктәп кагыйдәләрен төгәл үтәргә өндәде.

10 нчы март көнне  Арчада ГТО нормаларын тапшыру буенча зур гаилә ярышлары булды. Анда район мәктәпләреннән 16 гаилә катнашты. Безнең мәктәптән Шакировлар гаиләсе катнашты һәм “Җиңел атлетика буенча иң яхшылар” номинациясендә җиңү яулады.

    Хөрмәтле Шакировлар гаиләсе! Район, мәктәп  күләмендә үткәрелгән бәйгеләрдә, спорт чараларында, җәмәгатьчелек эшендә актив катнашуыгыз,  ирешелгән уңышларыгыз өчен зур  рәхмәт Сезгә!

    Сезгә нык сәламәтлек, эшегездә зур уңышлар, гаилә бәхете телибез.

10 мартта Шушмабаш урта мәктәбендә  “ Северный” хуҗалыгы җитәкчесе  Рөстәм Хәйруллин призына 2006 елда туган һәм аннан өлкәнрәк яшьтәге малайлар арасында милли көрәш буенча ярыш узды. Анда 70 тән артык яшь спортчы катнашты. Мәктәбебез командасы 2 нче урынны яулады. Яшь көрәшчеләрне чын күңелдән җиңүләре белән котлыйбыз, киләчәктә дә зур уңышлар, нык сәламәтлек телибез!

Менә күптәннән көткән яз бәйрәме - 8 март -Халыкара хатын-кызлар көне дә җитте. Мәктәбебездә берсеннән -берсе матур чаралар үткәрелде.

    Чираттагысы 7 март кичендә Ашытбаш мәдәният йортында  “Балалы солянка”  дип аталган иҗат концерты булды. Менә өченче ел рәттән Абдуллаҗанова Г Г җитәкләгән бию түгәрәгенә йөрүче укучыларның иҗат җимешләрен күрәбез. Чыннан да?  «җимешләр» бик татлы, матурлар. Бу кичтә сәхнә төрле , дәртле биюләрдән гөр килеп торды. Барысы алтмыштан артык бала катнашты.Ничек шулкадәр биюне истә калдырып бетергәннәрдер! Барысы да үзенчә матур, зәвыклы. Биюләр әниләрнең моңлы җырлары белән үрелеп барды.

      Киләчәктә дә Г. Гарәфетдин кызына, укучыларыбызга,  әниләребезгә зурдан-зур уңышлар, гаилә бәхете, тазалык-тынычлык телибез!

Акчишмә башлангыч мәктәбендә "Әткәй-әнкәй пар канатым" исеме астында гаилә бәйрәме  үткәрелде. Балалар әти-әниләренә, әбиләренә кулдан ясалган бүләкләрен , матур җырларын, эчтәлекле шигырьләрен бүләк иттеләр. Гаилә - тормышыбызның нигезе. Гаилә нык, тату икән, димәк, җәмгыять тә нык, тату дигән сүз. Әти-әни аның тоткасы булса, балалар гаиләнең көзгесе. Әгәр тотка купмасын, көзге ватылмасын дисәң, бер-береңне  рәнҗетми, хөрмәт белән яшәргә кирәк.

7 март көнне башлангыч класс укучылары әниләр, дәү әниләр, әбиләр өчен “Иң кадерлем-әнием” кичәсе үткәрделәр. Кичәдә аларга үзләренең матур шигырьләрен, җырларын, биюләрен, кулдан ясаган открыткаларын бүләк иттеләр. Кичәнең икенче өлешендә әниләр белән интеллектуаль бәйге үткәрелде. Бәйгедә әниләр балаларга үзләренең белемнәрен күрсәттеләр. Бәйрәм күңелле үтте.

Белгәнебезчә,гаилә һәр кешегә кирәкле җылы учак ул. Гаилә никадәр нык булса, аннан килгән җылылык та шулкадәр көчле була. Димәк, гаилә-ул иң олы таянычыбыз, иң ышанычлы сыеныр урыныбыз. Анда бер-берсен яраткан, бер-берсе турында кайгыртучанлык күрсәткән кешеләр яши.

3 марта в нашей школе проводились Большие семейные Игры -"ГТО всей семьей"