Безнең барыбыз өчен дә май бәйрәмнәре яңарыш, яхшылыкка өмет һәм ышаныч символлары булып торалар. Әлеге җылы яз көннәрендә күңелегез шатлык белән тулылансын, яңа яшәү көче бирсен.  

Г.Тукайның 129 еллыгын каршылап мәктәбебездә татар теле һәм әдәбияты укытучысы Г.Р.Җәләлетдинова "Тукай рухы мәңгелек" темасы буенча сочинение конкурсы үткәрде. Юсупова Кадрия 1 урын, Абдуллина Алисә, Юсупов Рәсим 2 урын, Мостафин Азат, Сәләхиев Газинур 3 урынга лаек булдылар.  Киләчәктә дә актив катнашуларын телибез. 

Татар теле атналыгы кысаларында Сингапур методикасы структураларын кулланып ,татар теле Һәм әдәбияты укытучысы А. М. Җамалиева 7 нче сыйныфта "Аерымланган хәлләр" темасына татар теленнән ачык дәрес күрсәтте.

Татар теле һәм әдәбияты атналыгы кысаларында А. М. Җамалиева җитәкчелегендә укучылар арасында Г. Тукай әсәрләренә рәсем конкурсы булып узды. Иң яхшы рәсемнәрдән күргәзмә оештырылды. 6 нчы сыйныф иң актив катнашты. Әлеге конкурсның җиңүчеләре: Сабирҗанов Салават 1 урын, Садыйкова Динә, Кәримова Алинә 2 урын, Галимҗанова Адилә һәм Ногманова Регина 3 урын. Җиңүчеләрне котлыйбыз, киләчәктә дә актив булуларын телибез. 

Мәктәбебездән  ике укучы Габдулла Тукайның иҗади мирасын өйрәнүгә багышланган Республикакүләм  IV нче  Тукай укуларында катнашып, зур уңышлар яулап кайттылар. Йосыпов Рәсим “Г. Тукай фотографияләрдә” исемле эзләнү эше белән 1 урын яулады (җитәкчесе: А. М. Җамалиева). Йосыпова Кадрия “Сабыйларның канатланыр вакыты мәктәпләрдә укыр чак булыр” темасына иҗади эше белән 3 урын алды (җитәкчесе: Г. Р. Җәләлетдинова). Афәрин, укучылар, сезне зур җиңүегез белән котлыйбыз. Киләчәктә дә  югары уңышларга ирешүегезне теләп калабыз.

  Г. Тукай көннәре кысаларында татар теле һәм әдәбияты укытучысы А. М. Җамалиева “ Г.Тукай  безнең күңелләрдә” исемле интеллектуаль уен уздырды. Анда 7 нче сыйныф укучылары Г.Тукайның тормыш юлы һәм иҗаты буенча булган белемнәрен күрсәттеләр. Әлеге уенның җиңүчесе булып Ибраһимова Динара калды. Укучыларыбызга киләчәктә дә яраткан шагыйребез иҗатын өйрәнергә, аны онытмаска  дигән теләктә калабыз

Арча сәнгать мәктәбендә Г.Тукай исемендәге конкурс кысаларында сәнгатьле укучылар бәйгесе үтте. Бу бәйгедә мәктәбебезнең 6 нчы класс укучысы Ногманова Регина Г.Тукайның "Мияубикә" шигырен, 8 класс укучысы Юсупов Рәсим "Бер татар шагыйренең сүзләре" шигырен тәкъдим итте. Җитәкчеләре татар теле һәм әдәбияты укытучысы Гөлфания Раифовна. 

Мәктәбебездә "Тукай көннәре" уңаеннан "Без - Тукайлы халык" исеме астында почмак булдырылды. Монда шагыйрьнең китаплары, тормышы һәм иҗаты турында мәгълүматлар урын алды. Бу эштә китапханәче Ф.Р. Әхмәдуллина, татар теле һәм әдәбияты укытучысы А.М.Җамалиева актив катнаштылар. 

Тукай көннәре, татар теле һәм әдәбияты атналыгы кысаларында, “Сабыйларга Тукай сүзе” исеме астында шигырь укучылар бәйгесе үтте. Бәйгедә 2-9 нчы сыйныф укучылары Г. Тукай шигырьләрен бик матур һәм сәнгатьле итеп сөйләделәр.  Нәтиҗәдә 6 нчы сыйныф укучысы Ногманова Регина 1 урын, 8 нче сыйныф укучысы Йосыпов Рәсим 2 урын, 7 нче сыйныф укучысы Фазылҗанов Айтуган 3 урын алдылар. Бәйгене татар теле һәм әдәбияты укытучылары А. М. Җамалиева, Г. Р. Җәләлетдинова уздырды.

Бөтенроссия "Язгы мәрхәмәтлелек атнасы" бара. Аның кысаларында мәктәбебездә бәйгеләр, акцияләр, класс сәгатьләре уза. Изгелек җирдә ятмый! Һәрберебез һәрвакыт изгелекләр генә кылып яшик!