Мәктәбебездә бала хокуклары атналыгы дәвам итә. Бүген, 20 ноябрь – Бөтенрәсәй балаларга хокук ярдәме күрсәтү көне. Шул уңайдан, укучылар белән, бала хокуклары турында тагын бер кат искә төшердек, белемнәребезне ныгыттык, “Карлсон кайтты” мультфильмыннан фрагмент карадык. Ике төркемгә бүленеп, мульфильм буенча, фикер алыштык, нәтиҗә ясадык.
    Конвенциянең эчтәлеген белмәү хәзерге заман баласына оят булыр иде. 18 яше тулмаган һәркем үзенең нәрсәгә хокуклы булуын белергә тиеш дип уйлыйбыз.
    Бүгенге көндә кешеләр хокукы дигән төшенчә һәркем өчен дә актуаль булып кала. Тормышта яклаулы, таянычлы булу, рәнҗетелгән очракта дөрес җавап кайтара белү өчен үз хокукларыңны белү кирәк.
    Димәк, йомгаклап шуны әйтергә кирәк, “Балалар хокуклары Конвенциясе ”нең максаты - балаларны яклау. Заманча дәүләттә балалар үз хокукларын якларга һәм дауларга, акыл һәм аң белән хокук нормаларыннан файдаланырга, шулай ук кеше хокукларын хөрмәт итәргә өйрәнергә тиеш.

    Ел да көзге-кышкы чорда Татарстанда елгалардагы бозлыкларда уннарча кеше һәлак була, шул исәптән балалар да. Куркынычсызлык кагыйдәләрен үтәмәгәнгә килеп чыга бу.
    Нык салкыннар башланганчы, бигрәк тә ноябрьдә, елга өстенә каткан боз тотрыксыз була. Кичке һәм төнге салкыннан ныгып киткәндәй булган боз көндез авырлыкны күтәреп тора алмый. Чөнки көндез көннең җылынып китүе белән боз үзенең ныклыгын югалта. Бүген класс сәгатьләрендә укучыларга кабаттан боз куркынычлыгы турында әңгәмә һәм инструктаж үткәрелде. Ата- аналарга памяткалар тапшырылды.

    Бүген Арча районы мәгариф хезмәткәрләре профсоюз оешмалары арасында өстәл теннисы һәм бадминтон буенча ярышлар уздырылды. Бу спорт чарасы Арча муниципаль районының укучылар сараенда бик оешкан төстә барды. Безнең Кушлавыч төп гомуми белем мәктәбе командасы да ярышларда катнашып уңышлы чыгыш ясады.Физик тәрбия укытучысы Мингазов Алмаз бадминтон ярышында 2 нче, инглиз теле укытучысы Әхмәтова Гүзәл өстәл теннисы ярышында 3 нче урынны яуладылар. Хезмәттәшләребезне җиңүләре белән чын күңелебездән котлыйбыз, аларга тагында уңышлар телибез.

    Кичә, 15 нче ноябрь көнне Буа муниципаль районы "Академик Р.З.Сәгъдиев исемендәге гомуми урта белем мәктәбе"ндә "Шәҗәрәләр - нәсел агачы" исемендәге V төбәкара фәнни-гамәли конференция булып узды. Буа муниципаль районы башлыгы Җаббаров Марат Азат улы конференцияне ачып җибәргәндә әйткәнчә финал турына 4 юнәлеш буенча 134 эш сайлап алынган. Безнең мәктәптән 9 нчы сыйныф укучысы Бикчәнтәев Р. "Гаиләмнең кадерле ядкяре" юнәлешендә чыгыш ясады. Әлеге секциядә 49 эш бар иде. Фәнни җитәкчесе Әюпова Р.Ф. белән әзерләгән эшен укучыбыз бик уңышлы тәкъдим итеп 2 нче дәрәҗә диплом иясе булды. Укучыларга истәлекле бүләкләр, дипломнар тапшырылды...

    1989 елның 20 ноябрендә БМО Бала хокуклары турында Конвенция кабул итә. Шул елдан башлап, 20 ноябрь - Бөтенрәсәй балаларга хокук ярдәме күрсәтү көне буларак игълан ителә. Конвенциядә 18 яшькә кадәрге һәрбер кешенең шәхси хокуклары күрсәтелгән, 54 матдәдән тора. Конвенциянең бурычы балаларның мәнфәгатьләрен кайгырту.Ул дәүләтне балалар өчен тиешле шартларны булдырырга өнди, балаларның дәүләт тормышында актив, иҗади катнашуларын сорый.
    Шушы уңайдан бүген укучылар белән бала хокуклары турында тәрбия сәгате үткәрдек. Безнең максатыбыз: балаларны “закон”, “бурычлар”, “хокук” төшенчәләре белән таныштыру, төп хокуклар турында күзаллау булдыру. законга хөрмәт хисе тәрбияләү, законнарның төрлелеген күрсәтү, хокук һәм бурычларны аерырга өйрәнү.
    Укучыларыбызның хокуклардан дөрес файдаланып, бурычларын үтәп яшәүләрен телибез. 

    Мәктәбебездә сулыкларда куркынычсызлык айлыгы башланып китте. Әлеге чараның төп максаты - сулыкларда боз каткач кешеләрнең бәхетсезлек очрагы, кышкы чорда сулыкларда үзеңне куркынычсыз тоту мәсьәләсе буенча кисәтү. Шушы айлык кысаларында, “Бозда һәм суда сак бул!” темасына рәсем бәйгесе игълан ителгән иде. Буген линейкада җиңүчеләр бүләкләнде, истәлекле бүләкләр тапшырылды.

    Бүген сыйныф сәгатьләрендә укучыларга яктырткыч фликерлар турында тагы бер кат мәгълүматлар җиткерелде. Юл йөрү кагыйдәләре кабат искә төшерелде. Ата-аналарга памятькалар әзерләнде.

    Бүген без мәктәп коллективы белән, тирә-юньне чистарту өчен, өмәгә чыктык. Мәктәп бакчасындагы яфракларны җыеп себердек, аларны түктек. Өмәдә барлык укучылар да бик теләп катнашты.

    Жан Бюффенның менә шундый канатлы сүзләре бар:” Кеше үзендә иркенлекне бары шул чагында гына сизә, әгәр ул бернәрсәгә дә бәйләнмәгән булса”. Безнең тормышыбыз тоташ бәйләнешләрдән тора: көн саен иртән без укырга яки эшкә барыр алдыннан кием, кибеттә азык-төлек, укып бетереп урта белем алгач, үзебезгә һөнәр сайлыйбыз. Шул ук вакытта аракы яки тәмәкегә бәйләнешне дә кеше үзе сайлап ала, гадәтне кешегә мәҗбүриләп тагып булмый. Ә кешелек барлыкка килгәндә бу начар гадәтләр булмаган да бит, алар безгә кайдан үтеп кергән соң? Шушы сорауга җавап табу максатыннан, бүген без “Тәмәке белән тартучы да яна” дигән темага тәрбия сәгате үткәрдек. 
    Укучылар белән зарарлы гадәтләр, аларның организмга нинди зыян китерүе, ничек кисәтергә кирәклеге, кешенең зарарлы гадәтләргә ничек ияләнүе турында сөйләштек. Укучыларыбыз киләчәктә яман гадәтләрне үз итмәсәләр иде дигән теләктә калабыз.

    Каникуллар тәмамланды,яңадан мәктәпләргә җыелдык. Без башлангыч класс укучылары белән балалар бакчасына кунакка кердек. Тәрбияче Алинә апалары белән балалар безне шатланышып каршы алдылар. Беренче класс укучылары мәктәп тормышы турында сөйләделәр. Ә нәни дусларыбыз үзләренең эшләре, уеннары, ничек итеп бәйрәмгә хәзерләнүләре турында матур итеп сөйләп бирделәр. Ахырдан табышмакларга җаваплар таптылар, шигырьләр укыдылар.