Уенчыклар белән уйнау гына түгел, аларны чиста һәм тәртиптә тоту да мөһим. Балалар бакчасына йөрүчеләр тәрбиячеләр күзәтүе астында уенчыклар юуны бик теләп башкаралар.

Бакчада һәр баланың яратып уйный торган уенчыгы бар. Шөгыльләрдән  буш вакытта нәниләр төрле уенчыкларны үз итеп уйныйлар. Балалар бакчасында күмәк уеннар вакытында бер-беренә карата хөрмәт, уенчыкларны "үземнеке" дип кенә кабул итмәү, ә иптәшләр белән бергә, килешеп уйнау, дусларның да фикерләрен тыңлый белү күнекмәләре формалаштырыла.

Бүген укучыларыбыз һәм укытучылар тарафыннан  чишмәләргә экскурсия оештырылды. Әлеге чара, беренчедән, "2016 ел - Су саклау зоналары елы" уңаеннан булса, икенчедән, авылларыбыз территориясендәге сулыклар, чишмәләрне белү, аларга карата сакчыл караш тәрбияләү максатыннан чыгып  үткәрелде.

Табигатьне күзәтәбез

Дус-ишләр белән бергә.

Беренче чәчәкләр чыккан

Безне сөендерергә!

Балалар бакчасындагы нәниләр саф һавада йөрергә чыккач язгы үзгәрешләрне күзәтергә яраталар.

  Мәктәптә һәм балалар бакчасында Габдулла Тукайның 130 еллыгына карата чаралар булып узды.  Балалар бакчасында шигырь бәйрәме, Габдулла Тукайның әсәрләре буенча  эшләнгән мультфильмнар карауны бик ошатты нәниләр.
     Ә менә мәктәп укучылары арасында олы шагыйрьнең тормыш юлы һәм иҗаты буенча  викторина үткәрелде. Укучылар үзләрен  шигырь язу буенча да сынап карадылар. 

Бүген мәктәбебезнең  1, 2 нче класс укучылары язгы табигатьне һәм андагы үзгәрешләрне күзәтергә чыктылар. Язгы һава торышы, кояш  тирә-юньгә, үсемлекләргә ничек тәэсир итә... Сорауларның барысына да җавапны укытучылар белән бергәлектә эзләде алар. Мең кат ишеткәнче, бер кат күрүең хәерлерәк, диләр бит.

Балалар бакчасында әвәләү шөгылендә балаларга Тукай шигырендәге Акбайны ясау бик тә ошады.

Бүген бездә өмә гөрләде. Мәктәп һәм балалар бакчасы территориясен чистарту буенча эш алып барылды.

Бөек шагыйребез Габдулла Тукайның тууына 130 ел тулу уңаеннан мәктәптә дә, балалар бакчасында да кул эшләре  күргәзмәсе көннән-көн тулылана. Бүген дә балалар бакчасына йөрүче Ильяс һәм Дилә Чумаковлар бик матур  итеп "Кәҗә белән сарык"  әкиятенә композиция эшләп алып килгәннәр. Әлеге композиция балалар бакчасындагы күргәзмәдә урын алды.

Бүген безнең мәктәп командасы Ашытбаш урта мәктәбендә уздырылган шашка ярышларында катнашып кайтты.  Ярышларда берничә районнан килгән командалар катнашу сәбәпле, бәйге шактый кызган темпта һәм көчле барды. Безнекеләр дә кимен куймады - башлангыч мәктәпләр арасында беренче урынга чыгып, грамота алып, сөенеп кайттылар. Котлыйбыз!