Бүген балалар кисеп - ябыштыру шөгылендә кыңгырау чәчәге ясадылар.  Иң беренче эш итеп балаларга Кызыл китап, аның максаты турында мәгълүмат бирелде. Шөгыльнең максаты - балаларда  Кызыл китапка кертелгән һәр үсемлеккә һәм  табигатькә  сакчыл караш тәрбияләү. Ясалган кыңгырау чәчәкләре әти-әниләр өчен күргәзмәдә урын алды.

 Март - яз ае булса да,

Кыш китәргә җыенмый. 

 Җилләр исеп, буран чыга

Карлар ява, туктамый.

 Ә безгә бик тә рәхәт

Ак кар белән уйнарга.

Карлы Мартның һәр мизгелен

Күңелләрдә сакларга.

Балалар өчен үсемлекләрнең ничек үскәнен күрү зур ачыш булып тора. Күзәтүләреннән чыгып, төрле нәтиҗәләр ясарга һәм дөньяны күзалларга ярата алар. Бакчабызда балалар белән утырткан суган, әнә, нинди зур булды инде!

Балалар бакчасында көндәлек режим саклана. Тиешле вакытта саф һавага чыгып   балалар  төрле уеннар уйныйлар. Әлбәттә, балалар бакчасыннан ук нәниләргә эш кораллары турында беренчел мәгълүмат бирелә, хезмәт төрләре аңлатыла.  "Хезмәт төбе - хөрмәт"  дигән девиз астында балалар  эш сөеп үсәргә тиеш.

Укучыларыбыз укытучылар җитәкчелегендә һәрдаим сәламәтлекне ныгыту өстендә эш алып бара. Бүген дә 4 нче класс укучылары "Сәламәт тәндә - сәламәт акыл" девизы астында гимнастика белән шөгыльләнделәр, соңыннан кагыйдәләрне искә төшереп  баскетбол уйнадылар. 

Халкыбызның бөек шагыйре Габдулла Тукайны балалар бакчасына йөрүче һәр бала диярлек белә. Балалар Тукайның нәниләргә багышлап язган әсәрләрен һәм әкиятләрен  бик теләп тыңлыйлар.  Бакчада Габдулла Тукайга багышланган стенд (почмак) булдырылды. Анда балаларның Тукай әсәрләренә нигезләнеп  үзләре ясаган рәсемнәре дә урнаштырылды.

Соңгы көннәрдә балаларның массалы рәвештә грипп белән авырулары сәбәпле (24 баланың 16сы -66,7%)  һәм  төп дәүләт санитар врачының  карары нигезендә (№15/2 от 14 марта 2016г.) Пешәнгер балалар бакчасы 15 нче марттан 21нче мартка кадәр карантинга ябылды.

 Бүген  ел башыннан төрле конкурсларда катнашкан укучыларыбызга дипломнар һәм грамоталар тапшырып үттек.

Закирҗанова Гөлинә, 4 нче класс, коррупциягә каршы юнәлеш буенча башкарылган иҗади эшләр конкурсында 3 нче дәрәҗәдәге диплом, Галаветдинова Гөлфия,4 нче класс, "Зирәк бала" конкурсында катнашып  диплом,

Хабибуллина Гөлия, 4 нче класс, Олимпиада "Плюс" үткәргән математика буенча он-лайн олимпиадада уңышлары өчен диплом белән бүләкләнә.

Бүген безнең балалар бакчасына һәм мәктәпкә кунаклар килде: Арча эчке эшләр бүлегенең өлкән участок вәкиле полиция майоры Хисамиев Ленар Альтафович һәм  Арча ЮХИДИ бүлеге вәкиле Мухаметзянова Энҗе Газизовна.   Кунакларга балалар бакчасына йөрүче өлкәннәр төркеме "Светофор - якын дустыбыз" дип әзерләнгән чара тәкъдим итте. Ә мәктәп укучылары "Юлда булсаң, бул өлгер, юл йөрү кагыйдәсен нык бел!" дип исемләнгән  викторинада катнаштылар. Әлеге чаралар юл йөрү кагыйдәләрен искә төшерү, кабатлау һәм күпмедер дәрәҗәдә яңа белем туплау максаты белән үткәрелде.  Мәртәбәле кунакларыбыз   укучыларга һәм балаларга, мәктәбебезгә зур бүләкләр тапшырдылар, аларга бик зур рәхмәтебезне белдерәбез. Барыбызга да юл йөрү кагыйдәләрен төгәл үтәп, юлларда исән-имин йөрергә язсын!

Арчадан кигән кунаклар истәлекле бүләкләр тапшырдылар.