Бүген Казан шәһәрендә Каюм Насыйри исемендәге 17 нче төбәкара фәнни тикшеренү эшләре буенча конференция узды. Мәктәбебездән 9 нчы класс укучысы Галиахметова Эльвина " Сәламәт тәндә -сәламәт акыл" дигән фәнни эше белән уңышлы чыгыш ясады, грамота белән бүләкләнде. 

"Здоровое питание - активное долголетие" - Бөтенроссия акциясе кысаларында 1-3 класс укучылары белән "Су һәм сәламәтлек" темасына тәрбия сәгате үткәрелде.  Укучыларга кеше организмы өчен суның кирәкле һәм файдалы булуы аңлатылды. Суның составы, үзенчәлеге хакында сөйләнде. 

Бүген "Здоровое питание- активное питание" Бөтенроссия акциясе кысаларында  6 класста "Дөрес туклану серләнү" ("Я  то, что ем" ) темасына класс сәгате үткәрелде. Класс җитәкчесе Фазлыева  И.В. укучыларга дөрес туклану  кагыйдәләрен аңлатты. Укучыларга сәламәт булу өчен нинди ризыклар ашарга кирәклеге, кайсы ризыкта нинди витамин барлыгы турында мәгълүмат бирелде. Әңгәмә өчен кызыклы презентация кулланылды. 

Кичә  башлангыч  профсоюз оешмасының отчет сайлау җыелышы үткәрелде. Профкомның, ревкомиссиянең 2017-2019 елларга отчеты тыңланды.  Оешманың шушы елларда эшләнгән эшләренә уңай бәя бирелде. Профком рәисе итеп ябык тавыш бирү нәтиҗәсендә Әхмәтҗанова Г.Х. сайланды. 

Бөтенроссия акциясе "Здоровое питание - активное долголетие"  кысаларында 8 класста "Дөрес туклану кагыйдәләре" ("Я то, что ем") темасына класс сәгате үткәрелде. Кеше сәламәт булырга теләсә, дөрес тукланып яшәргә тиеш дигән нәтиҗәгә килделәр.

Бүген мәктәп коллективы чираттагы педагогик киңәшмәгә  җыелды. Киңәшмәнең эш тәртибе:

1. 3 нче чирек нәтиҗәләре һәм 4 нче чиреккә бурычлар.

2. Класс җитәкчеләренең 3 нче чирек нәтиҗәләре буенча чыгышлары.

3. Арадаш аттестация һәм аны уздыру формаларын сайлау. 

22 нче март - "Су көне" буларак билгеләп үтелә. 7-8 класс укучылары  белән үткәрелгән тәрбия сәгатенең максаты: укучыларны дөньякүләм һәм  халыкара табигать көннәре белән таныштыру, суның кеше тормышындагы әһәмияте, аны саклау юллары турында белешмә бирү, укучыларда су ресурсларына сакчыл караш, шәфкатьлелек тәрбияләү.

Табигатьне саклау - һәр кешенең изге бурычы ул. 21 март (көн белән төннең тигезләшкән вакыты) һәм 22  апрель көннәре Бөтендөнья Җир көне дип исәпләнә. Укучыларның экологик белемнәрен тирәнәйтү, табигатькә карата гуманлы мөнәсәбәт, тереклек өчен җаваплылык хисләре тәрбияләү - бүгенге класстан тыш чарабызның төп максатлары иде. 

Бүген мәктәбебезгә район Иҗтимагый советы эшче төркеме килде.  Кунаклар мәктәбебез тормышы белән таныштылар. Укучылар һәм укытучылар тырышлыгы белән яуланган грамоталар, кубоклар, оста куллар түгәрәгендә ясалган эшләнмәләрдән торган күргәзмәне бик кызыксынып карадылар. Укучылар кунакларга Нәүрүз бәйрәменнән күренеш тә курсәттеләр, урамда бергәләп коймак ашадык һәм самовардан кайнар чәй эчтек. 

Табигать фәннәре атналыгын дәвам итеп, 5 класс укучылары белән "Мавыктыргыч биология" темасына  уен - дәрес үткәрелде. Укучыларның биологик белемнәрен мавыктыргыч формада киңәйтү, фәнгә кызыксыну уяту, укучыларның коллективта аралашу күнекмәләрен, тел байлыгын үстерү бүгенге уен - дәресебезнең төп юнәлеше. Уенның девизы: "Акыллы бул, бирешмә. Көндәшеңнән калышма." Дәресебездә дуслык җиңде. Укучыларыбыз белемнәрен тиешенчә күрсәтә алдылар.