Мәктәбебез чәчәккә күмелеп утыра -  бу укучылырыбызның тырыш хезмәт нәтиҗәсе.

     Мәктәп бакчасында карлыган өлгергән -  җыеп кына өлгер! Кышка витамин туплап калыр чак. Тырыш укучыларыбыз: Гөлназ, Гөлнар, Айтирәк, Риназ, Инсаф һәм укытучылары Ләйсән апалары моны бик яхшы аңлыйлар.

    Хәзер табигатьнең иң матур  фасылы – җәй, җиләкләр  пешеп җиткән вакыт. Каен  җиләге, җир җиләге, бакчаларда  виктория өлгерде. Мәктәп бакчасында эшләүче укучыларыбыз бүген виктория җиләге җыйдылар.

     9 нчы класс укучыларын иң бәхетле көннәре- Аттестат алулары белән чын күңелдән котлыйбыз! Олы тормыш юлында сынауларга бирешмичә, уңышлар юлдаш булсын!

    Лагерь балалары Бөек Ватан сугышы ветераны Дәүләтшин  Фатых  абый янына кунакка бардылар." Гел кояш елмайсын, илебез күге тыныч булсын, тыныч тормышның кадерен белегез !"  Ветеранның бу сүзләре балалар күңеленә тирән уелып кереп калды.

   Иң күңелле көн бүген,

Сабантуйга килегез!

Капчык киеп йөгерегез,

Чабыгыз,сикерегез!

  Лагерьга Гөберчәк авылы китапханәчесе Зарипова Гөлфирә Зөфәр кызы килде.Балаларны яңа китаплар белән таныштырды. "Серле китап" уены балаларга гына түгел, вожатый апаларга да бик ошады. Иң актив укучы  өр-яңа ,Гөлфирә апача әйтсәк  "табадан гына төшкән" китап белән бүләкләнде.

     Бүген лагерьның иң җанлы көне булды. Кармакларыбызны алып су буена балык тотарга бардык. Иң күп балык тотучылар Илназ, Илүсә, Рәзиләләр булды. Бүтәннәр дә алардан калышмаска тырышты. Соңыннан үзләренең балык тотуларын рәсем итеп кәгазь  битенә төшерделәр. Көн бик күңелле үтте.

  Әкиятне кайсыбыз гына яратмый?! Бүген без "Әкиятләр  илендә".  Тылсымлы таяк үз кулыбызда: телим Таңбатыр булам, яисә Кызыл Калфак. Кем булсак та,  яхшылык кына эшлибез.  Ә безне таныйсызмы?

   Һәркем җиңүгә омтыла.”Күңелле стартлар” барышында “Гөлкәйләр” дә, “Елмай” да сынатмадылар, бергәләшеп ярыштылар. Саф һавада рәхәтләнеп күңел ачтылар, көч сынаштылар. Матур көннең нәтиҗәсе дә матур булды – ДУСЛЫК җиңде! Соңыннан күмәкләп татарча бию кәефләрне тагын да күтәрде.

Бергәләшеп шәп ярыштык,

Беркем читтә калмады.

Нәтиҗәләр күркәм булды:

Дуслык җиңү яулады!