Ел саен татар халкының милли бәйрәме - Сабан туен бакчабызда үткәрү гадәткә керде. Бүген дә табигатьнең иң матур җирендә - тау башында бәйрәм иттек.  Балаларыбыз Сабантуйда уйнала торган барлык уеннар да үзләрен сынап карадылар. Әмма иң күркәме милли көрәш булды. Малайлар чын күңелдән бил алыштылар һәм иганәчеләр бүләк иткән машиналарны яуладылар. Башка уеннар да бүләксез булмады. Балаларны сөендергән иганәчеләргә һәм әти-әниләргә чын күңелдән зур рәхмәтебезне җиткерәбез, эшләрендә зур уңышлар, гаилә бәхете телибез. 

Оста куллы әтиләр ярдәме белән бакчабызда җил тегермәне пәйдә булды. Аларга зур рәхмәтебезне белдерәбез.

Бүген бакчабызда бераз моңсу да, шул ук вакытта күңелле дә бәйрәм - чыгарылыш кичәсе булды. Мәктәпкә хәзерлек төркеме балалары  дуслары, тәрбиячеләре белән саубуллаштылар. Аларга өйрәнгән шигырьләрен, җырларын, чәчәк бәйләмнәрен бүләк иттеләр. Ә без - тәрбиячеләр - аларга бары изге теләкләр генә теләп, озатып калдык.

Территориядәге бакчаларга чәчәк үсентеләре утыртабыз. Георгин, астра, циния, сальвия, кыңгырау, виола, бархатцы чәчәкләре безнең бакча балаларын җәй буенча  сөендерер.

Юлга чыктык без бергә

Туган илдә йөрергә...

"Исәнме, ямьле җәй" проекты кысаларында максатчан экскурсияләргә йөрү дәвам итә. Балалар бу көннәрдә су буйлары белән ташыштылар. 

Үз илемдә ямьле миңа

Бәрәңге бакчасы да. 

Бакчыбызда язгы эшләр гөрләп бара. Бүген территориядәге бакчага бәрәңге утырттык.

"Исәнме, ямьле җәй!" проекты кысаларында табигатькә максатчан экскурсияләр оештырылды. Балалар табигатьтәге үзгәрешләрне күзәттеләр, табигатьне сакларга кирәклегенә төшенделәр.

Озын яллардан килүебезгә бакчабызда беренче чәчәкләр - лалә, нәркисләр аткан. Бу чәчәкләр тирә-юньгә ямь, яктылык, матурлык биреп торалар. Һәр җирдән яз сулышы бөркелә.

Бүген бакчабызның мәктәпкә хәзерлек һәм зурлар төркемендә тәрбияләнүче балалары авылыбызның сугышта ятып калганнар хөрмәтенә куелган һәйкәл янындагы митингта  катнаштылар. Һәйкәлгә үзебезнең бакчада үскән яран гөлләрен куйдылар. 

Бакчабызда күпъеллык нәркиз, лалә, умырзая чәчәкләре чыкты. Түтәлләрне чистартып, чүптән арындыру, территорияне чистарту, буяу, матурлау эшләре бара.