25 нче октябрь көнне мәктәптә "Көзге уңыш бәйрәме"  узды. 5-9 сыйныф укучылары катнашында узган әлеге чара, КВН форматында оештырылды. Чарага һәр сыйныф  бик тырышып әзерләнгән иде. Укучылар көзге мода күрсәттеләр, җырладылар, биеделәр, сорауларга тапкыр җаваплар бирделәр. Иң күп баллны 5 нче сыйныф укучылары җыйды, 2 нче урында - 6 нчы сыйныф укучылары. 

РФ Конституциясенең 20 еллыгы уңаеннан, ТР Мәгариф һәм Фән министрлыгының 18.09.2013 ел 12750/13 № лы хаты нигезендә, мәктәптә төрле чаралар оештырыла. Шуларның берсе 1-4 сыйныф укучылары арасында "Конституция глазами детей"дигән рәсемнәр конкурсы. Әлеге конкурста 4 нче сыйныф укучысы Гаттаров Ранис 1 нче урын яулады.

Кичә, мәктәптә 1998 елга кадәрле укучылар арсында бадминтон ярышларының зона туры узды. Иске Чәчкаб, Мөрәле, Ульянково, Надеждино командалары катнашкан әлеге ярышларда кызлар һәм малайлар чыгыш ясады. Безнең мәктәптән малайлар арасында, Мөхетдинов Нияз - 2 урынга, кызлар арасында Тазиева Дания, Хуҗина Гүзәл, Шәмсетдинова Илзирә 2-3 нче урынга ия булдылар. Әлеге укучыларыбыз районда финалда  катнашачаклар.

Мәктәбебез горурлыгы булган "Салават күпере" ансамбле һәм Гаттарова Адилә (җитәкчеләре Габидуллина Л.Ә.), "Ватан" VI нчы  Республикакүләм халык иҗаты фестиваленең сайлап алу турын үтеп, республика этабына чыктылар. Сайлап алу турында, Казанда балаларыбызның иҗатын видеодан карап Миңгол Галиев җитәкчелегендәге мәртәбәле  жюри бәяләде. Ике елга бер үтүче әлеге бәйгедә татар халык җырларын башкару таләп ителә.  Укучыларыбыз 1 ноябрьдә КСК "Уникс" та фестивальнең ярымфиналында катнашачаклар. Аларга без зур уңышлар телибез!

Бүген, районда узган  белем бирү учрежденияләре оештырган "Уңыш бәйрәме"ндә катнаштык. Мәктәп участогында үскән нигъмәтләрдән күргәзмә әзерләдек, шактый гына яшелчәләребезне саттык та.

Бүген кабат, әтиләребезне өмәгә чакырдык. Мәктәп бакчасының тагын бер ягына рәшәткә тотабыз. Бүген әтиләребез чокыр казып багана утырттылар. Яңгыр явып торуга да карамастан шактый гына эш эшләнде. Ярдәмгә килгәннәре өчен әтиләребезгә зур рәхмәт белдерәбез!

Җиңүнең 70 еллыгы уңаеннан мәктәп планы буенча төрле чаралар үткәрелә. Чираттагысы бүген үтте. Тарих укытучысы Габидуллина Гүзәл Илшат кызы  "Курск дугасындагы сугыш" та Җиңүгә 70 ел уңаеннан 5-9 сыйныф укучылары өчен  чара үткәрде. Әлеге бәрелешләрнең тарихын сөйләде, ахырдан документаль фильм карадылар. 

Бүген хөрмәтле укытучыларыбыз һөнәри бәйрәмнәрен билгеләп үтәләр. Әлеге бәйрәм уңаеннан мәктәбебездә чаралар планлыштырылды. Укучылар үзидарәсе дәресләр үткәрү һәм укучылар өчен концерт оештыруны үз өсләренә алдылар. Эшкә килүче һәр укытучыны укучылар бәйрәм белән котлап, чәчәк бүләк итеп каршы алдылар. Ветеран укытучыларыбыз да читтә калмады, аларның өйләренә барып бүләк тапшырып бәйрәм белән котладык.

2 нче октябрь көнне авыл җирлеге белән мәктәп берлектә, авыл халкы өчен чәй табыны әзерләп бәйрәм оештырдылар. Укучылар исә, бәйрәмнең бизәге булдылар, аларның чыгышларын әби- бабайларыбыз яратып кабул иттеләр, көчле алкышларга күмделәр. 

Өлкәннәр ункөнлеге уңаеннан мәктәптә "Әбием сандыгыннан..." дип аталган күргәзмә оештырылды. Әлеге күргәзмә өчен укучылар әбиләренең сандыкларында сакланган, кулдан чигелгән, тукылган сөлгеләр, өстәл япмалары алып килделәр. Күргәзмәдә шулай ук борынгы күлмәкләр, читекләр дә бар иде.