2004-2008 елгы ир балалар һәм 2006-2007 елгы кыз балалар өчен армрестлинг буенча шәһәркүләм бәйгедә Хабибуллин Илнур Рафаэлевич җитәкләгән команда беренче урын яулады. Шаехов Райнур, Хаертдинов Рамил, Ясабиева Розалина, Муллаяров Нияз, Габидуллин Адел – әлеге көчле командада чыгыш ясаучы укучылар. Афәрин, гимназиянең көчле спортсменнары! 

    Яр Чаллы шәһәре мәгариф идарәсе башкарма комитеты һәм Татарстан Республикасы хәрби комиссары С.Н. Погодинның мәгълүмати хаты нигезендә “Солдатка хат” акциясе оештырылды. Акция нигезендә гимназиянең 200 дән артык укучысы җылы эчтәлекле хатлар язды. Әлеге хатлар өчпочмак формасында ясалып, тышына Россия Федерациясе солдатына” дип адресланды, хәрби комиссариатка илтеп тапшырылды.

Шәһәребездә мәзәк, уен – көлке яратучылар өчен  «Шаяннар һәм тапкырлар клубы” (ШТК) уеннары  уздырыла.  Аны 14нче санлы  балалар һәм яшүсмерләр  үзәге оештыра. Егерме беренче март көнне “Шатлык” Яшьләр үзәгендә  ШТК  ның өченче ярымфинал уены булып узды. Мулланур Вахитов исемендәге гимназия укучылары бу уенга зур дулкынлану белән әзерләнделәр. 
Жюри составында шәһәребездә билгеле шәхесләр белән беррәттән  мәгариф идарәсенән дә вәкил бар иде. Нотфуллина Мәликә  җитәкчелегендәге “Замба” ШТК (“Замана балалары”) командасы бу уенда, башка көндәшләренә караганда,  өстенрәк булып чыкты. Алар 1 нче дәрәҗә грамота белән бүләкләнделәр. Татар халкында: “Йөргән таш шомара, яткан таш мүкләнә” дигән әйтем бар. “Замба” командасы узган ел ахырында Казан шәһәрендә булып узган “Әйдә, шаяРТ ТВ” фестивалендә катнашып,  шактый шомарганнар. Шуңа күрә дә жюри әгъзалары  уңай һәм кимчелекле якларны санаганда финалга тагын да ныклабрак әзерләнергә кирәклегенә басым ясады. Кызыклы  уен дәвам итә.  Финал уенында да “Замба”га уңышлар телибез.

P.S. Сүз уңаеннан: “Замба” һәм “Демокрит- стелит” КВН командаларында уйнаучы егет-кызларга, әти-әниләренә гимназия администрациясе тарафыннан зур рәхмәтебезне җиткерәсебез килә!

В связи с эпидемиологической ситуацией в стране II этап межрегиональной научно-практической конференции имени М. Вахитова пройдет в заочном режиме, то есть экспертная комиссия оценит исследовательские и проектные работы учащихся, прошедшие в I тур и выявит победителей конференции.
Итоги II тура межрегиональной научно-практической конференции имени М. Вахитова будут опубликованы на сайте МБОУ «Гимназия №2 имени М. Вахитова» не позднее 11 апреля 2022 года. Дипломы и сертификаты для участников конференции будут отправлены на личную электронную почту научного руководителя не позднее 30 апреля 2022 года.

Бүген квест дигән сүзне белмәгән бала аздыр.Аларның ялын кызыклы һәм мавыктыргыч итү максатыннан,бу чара еш кулланыла.Quest сүзе "эзләү" дип тәрҗемә ителә. 15 нче март көнне бер төркем 7г,8б,8в сыйныфы укучылары да "Заман" яшьләр үзәгенә "ТатарQuest" уенына юл тотты. Ишектән килеп керүгә үк ачык йөзле апа- абыйлар каршы алды.Алардан бөркелгән җылылык,серлелек безнең күңелләрне тагын да җилкендерде. КамАЗ, шәһәр төзелеше елларына кереп киткәнне сизми дә калдык.Уен 7 этаптан торды.Һәр этап кызыклы итеп оештырылган иде.Төрле станцияләрдә үзебезнең белемнәребезне сынадык. Ныклы әзерлек белән килгәнлектән, уен этапларын җиңел үттек.Квест уенында бик күп сорауларга җавап эзләдек.Менә алар: -шәһәр төзелеше тарихы; -Чаллы шәһәрен төзүгә зур өлеш керткән күренекле шәхесләр; -халкыбызның мәдәнияте,гореф- гадәтләре; -КамАЗ заводын төзергә килеп,шушында яшәп калган 70 милләт халкы дуслыгы; - күренекле язучыларыбыз,артистларыбыз һ.б.лар. Бу очрашу күңелләребездә якты эз калдырды.Күпме белем тупладык,сокландык,горурландык.Шәһәребезне төзегән һәр кешегә, әби- бабаларыбызга чиксез рәхмәтле булып кайтып киттек.Уен ахрында тапшырылган бүләкләр очрашу истәлеге булып калды.Өебезгә кайтып җиткәнче яз кояшы иркәләде.Күңелләрне якты уйлар,яшәү дәрте биләде.

8 в сыйныфы җитәкчесе: Фатихова Нәзлия Гаян кызы

8 Март – Халыкара хатын-кызлар көне. Бу бәйрәм көнен билгеләп үтәргә Мулланур Вахитов исемендәге 2 нче гимназия укучылары алдан ук әзерләнде: котлау сүзләре белән стена газетасы чыгардылар, укытучы апаларга бүләк итәргә открыткалар ясадылар, бәйрәм концертын әзерләделәр.

Иртәдән җыр – моң яңгырагач, бәйрәм кәефе тагы да күтәрелә. Вәлеева Суфия Василовна җитәкләгән гимназия профкомы Укучылар Советы белән берлектә (Спикер – Нотфуллина Мәликә Руслановна, шәһәр укучылар советы депутаты – Рәхимов Әмир Динарович), укытучыларга изге теләкләр әйтеп, открыткалар, бүләкләр биреп каршы алдылар.

Көндезге 13.00 сәгатьтә гимназиядә хезмәт куючы апаларны котлап бәйрәм концерты күрсәтелде. Концерт башлануга сүз гимназия директоры Набиуллина Лиза Рихмановнага бирелде. Ул бәйрәм белән котлап коллективка изге теләкләрен җиткерде, юбилярларны Мактау хатлары белән бүләкләде.

Концертта Татарстанның атказанган сәнгать эшлеклесе Зәйнуллина Әлфия Тәүфыйк кызы җитәкләгән “Әллүки” вокал ансамбле, Вәлиев Марат Минсабир улы җитәкләгән “Абау!”, “Мизаж” ансамбльләре чыгыш ясады. 11А сыйныфы укучысы Мөхәммәтшина Индира башкаруында “Бас, бас, әйдә бас!” дигән җырын бәйрәм кунаклары аеруча яратып кабул итте. Нәфис затларны котларга гимназиядә эшләүче ир-ат укытучылар шигъри юллардан гөлләмә әзерләгәннәр. “Эх, сез матур кызлар” дигән җырны башкарулары да гүзәл хатын –кызларның күңелләренә хуш килде.

4в сыйныфы укучылары (сыйныф җитәкчесе – Гыйниятуллина Илфира Сабировна) укытучы апаларга яратып әйтелгән шигырьләрне, шул ук класстан Кашапова Зилия Нәби Дәүлинең “Әни”дигән әсәреннән өзекне чын сәнгать осталарыдай матур итеп сөйләделәр.

Бәйрәм концерты зәвык белән әзерләнгән иде. Концертны нәфис сүз осталары - 10А сыйныфы укучысы Дәүләтшин Рөстәм, 10Б сыйныфы укучысы Евграфова Камилә алып барды.

Быел Татарстаныбыз Идел буе Болгар дәүләтендә ислам дине кабул ителүнең 1100 еллыгын билгеләп үтә. Шушы уңайдан Мулланур Вахитов исемендәге гимназиядә класс сәгатьләре үткәрелде. Тарих укытучысы Каюмов Ренат Габдрахман улы үткәргән дәресләр, укучылар эшләгән рефератлар аша әби – бабаларыбыздан килгән динебезнең ничек барлыкка килүе бәян ителде. Гимназия укучылары үзләрен кызыксындырган сорауларга җавап таптылар. Төрле конфиссияләр, дини агымнар, дингә карата төрле карашлар яшәгән вакытта укучыларга ислам дине турында дөрес мәгълүмат җиткерелде. "Ислам дине ул - кешелеклелек, аек акыл белән яшәү, әти- әниләргә ихтирамлы булу, туганнарга, дусларга, бер – береңә карата дустанә мөнәсәбәттә булу, шулай ук табигатькә, хайваннарга карата миһербанлы булу, һәрнәрсәгә сакчыл караш тәрбияләү, төрле дин, төрле милләт кешеләре белән аңлашып, дус булып яшәү, ягъни толерант булу”, - дип йомгак ясалды.