Әниләр бәйрәме уңаеннан оештырылган "Бердәм гаилә" рәсем күргәзмәсендә һәр гаилә иҗади якын килеп катнашты. Рәсемнәр "Безнең гаилә", "Спорт сөюче гаилә", "Музыкаль гаилә", "Хезмәт сөюче гаилә", "Күңелле ял итәбез" темалары астында кабул ителеп әти-әниләр, балалар хозурлыгына куелды.

"Шатлык" балалар бакчасы коллективы башкалабыз Казанның тарихи истәлекле урыннарына экскурсия оештырып Кол Шәриф мәчете, музейлар да булып Казанның, Татарстанның тарихы белән танышып рухи байлык тупладылар. Галиәскәр Камал театрында "Бабайлар чуагы" комедиясен карап чын мәгънәсендә ял иттеләр.

Балаларда кеше арасында, табын артында үз-үзеңне тоту кагыйдәләрен ныгыту, аралаша белү күнекмәләрен арттыру, кунакчыл булырга, кунакларга хөрмәт күрсәтергә өйрәтү, үзеңне әдәпле тоту, бер-береңә игътибарлылык, ярдәмләшү, дуслык хисләре тәрбияләү атна дәвамында балаларның бердәм эшчәнлеге, эшчәнлектән тыш вакытларда әңгәмәләр, уеннар, матур әдәбият белән таныштыру аша алып барылды. Йомгаклау чарасы итеп зурлар төркеме балалары тәрбияче Сафиуллина Әлфия Камил кызы тырышлыгында "Куянда кунакта" педагогик ситуация сәхнәләштерелде. Кунакка килгән урман җәнлекләре үзләренең үрнәгендә тәртипле, итәгатьле, әдәпле булу кагыйдәләре белән иптәшләрен таныштырдылар.

Бәйгедә уңышларга ирешеп кайткан балаларны безнең бакчабыз администрациясе дә тәбрикләп аларга мактау грамоталары тапшырды. 

Бүген Саба мәдәният йортында балалар җырлары һәм татар халык җырларын башкаручы балалар арасында үткән "Җырлы балачак" бәйгесенең йомгаклау өлеше- финал булды. Анда безнең балалар бакчасыннан музыка җитәкчесе Мустафина Дилбәр Фатыйх кызы әзерләгән "Күңелле балачак" ансамбле уңышлы гына чыгыш ясады. Балалар башкарган җырның да исеме "Күңелле балачак". Балаларның тырышлыклары юкка булмады. Алар "Җырлы балачак" җыр конкурсының финал бәйгесендә катнашып уңышлы чыгыш ясаган өчен Саба муниципаль районы Башкарма комитетының мәдәният бүлегенең  ДИПЛОМы белән һәм балалар акчалата бүләк белән тәбрикләнделәр. 

Шунысы күңелле, безнең балалар бакчасында балаларга милли уен коралларында уйнарга өйрәтү  традициясе  озак еллар дәвамында сакланып килә. Бу чыгышта балалар җырларын уен коралларында уйнап башкардылар. Бу үзенчәлекне "Саба дулкыннары" ТРК хезмәткәрләре дә игътибарга алып безнең нәни артистларыбыздан интервью алдылар. Сез аны "Саба дулкыннары" ТВ эфирында күрә аласыз.

Бүген без мәктәпкә әзерлек төркеме балалары белән Саба "Икмәк" заводына экскурсия ясадык. Максат: икмәкнең өстәлгә килгәнче үткән юлы турында төшендерү, безнең өстәлләрдә тәмле ипикәй булсын өчен кемнәр һәм нинди хезмәт куюлары турында һәм иң кадерле әйбер ул  икмәк булуын аңлату. 

Биредә балаларны бик матур итеп каршы алдылар. "Икмәк" заводы хезмәткәрләре тыгыз эш вакыты булуга карамастан һәрберсе башкарган эше турында бәйнә-бәйнә сөйләде. Балалар ипи пешерү пичләрен күрделәр, пироглар, өчпомаклар, тортлар пешерү цехларында булып андагы эш барышын күзәттеләр. Бу очрашу тәмле, хуш исле, кайнар ипикәйдән авыз итү белән тәмамланды.

Эскурсиядәге мизгелләр

"Икмәк" заводына экскурсия мизгелләре