Мәктәбебездә “На страже Отечества” конкурсының сайлап алу туры үтте. Яхшы  дип табылган түбәндәге укучыларның 7 эше  районга балалар иҗат үзәгенә тапшырылды – 1 сыйныфтан Фәләхиева Илүзә, Әмиров Бәхтияр; 6 сыйныфтан Каюмова Ясминә, Гайфуллина Альбина; 7 сыйныфтан Гильманова Лилия, Фәтхриева Алисә; 10 сыйныфтан Мансурова Лилия. Бу бәйгедә укучыларга уңышлар елмайсын дигән теләктә  калабыз.

Мәктәбебездә математика атналыгы бара, шул уңайдан буген “Математик терминнарны иң дөрес язучы” конкурсы булып узды, 6 сыйныфларда “Математик ярыш” үткәрелде. Укучыларыбыз узләренең көчләрен сынадылар, атналыкта бик теләп катнашалар. Алга таба да укучыларыбызның актив булуын теләп калабыз!

Юлбат  урта мәктәбенең 9 нчы сыйныф укучысы Гүзәл Кәримова 22-26 нчы январь көннәрендә, Казанда  Татарстан беренчелегенә үткәрелгән Халыкара шашка төрендә (классикада) II урын, ә  тиз уйнау төрендә I урынга иреште. Гүзәлне уңышлары белән чын күңелдән котлыйбыз!

24 январьда Эзмә мәктәбе базасында укучыларның чаңгы эстафетасы һәм мылтыктан ату ярышлары үткәрелде. Бүген район үзәгендә  укучыларның турникта тартылу, идәннән этелү һәм урыннан озынлыкка сикерү буенча ярышлар узды. Бу ярышларда безнең мәктәбебез укучылары да катнашты.

Россия Федерациясе законнары кысаларында 17 яше тулган һәр ир-егет үзе яши торган төбәктә хәрби учетта торырга тиеш.  Безнең мәктәптән дә 6 егет шушы көннәрдә хәрби комиссариатта  тиешле  медицина тикшеренүе, махсус анкеталар тутырып, тестлар үтеп хәрби учетка бастылар. Мәктәп линейкасында, иптәшләре каршында, аларны тормышларындагы шушы җаваплы этапка аяк басулары белән тәбрикләп, хәрби учетка басуларын дәлилли торган таныклык тапшырылды.

Быелның гыйнвар аенда совет гаскәрләре тарафыннан Ленинград шәһәрен  немец-фашист гаскәрләре блокадасыннан тулысынча азат итүгә 70 ел тула. Бу уңайдан Мәгариф министрлыгының 20.01.2014  №622/14 хаты нигезендә гомумбелем бирү мәктәпләрендә батырлык дәресләре үткәрелә. Тәрбия сәгатьләренә эзләнү отрядларын, тыл ветераннарын чакыру тәкъдим ителә.

9 нчы  сыйныф  укучысы  Кәримова  Гүзәл  22  гыйнвардан  алып   26 гыйнварга  кадәр  Казанда  Татарстан  Беренчелегенә  үткәреләчәк  шашка  ярышларында  катнашачак.  Гүзәлгә  зур  уңышлар, җиңүләр  яулап  кайтуын  телибез!

КФУ тарафыннан һәр елны үткәрелә торган интернет олимпиадаларның  I  туры тәмамланды. Шул уңайдан күп кенә укучыларыбыз  II турга катнашу хокукына ия  булдылар. Алар: 9 класстан  Кәримова Г. (биология, математика, физика); 10 класстан Шакирҗанова Л., Рәхимуллина Р (татар теле), Гомәрова  Г. (геология, физика); 11 класстан Фәләхова Ф. (математика, география, геология, рус әдәбияты).  Укучыларны уңышлары белән чын күңелдән котлыйбыз!

13 нчы январьдан 18 нче январьга кадәр  мәктәбебездә инглиз теле  атналыгы булып үтте. Атналык укучылар өчен кызыклы  һәм эчтәлекле  итеп үткәрелде. 5-6 классларда  КВН, 9-11 классларда «Страноведческая викторина», 3 классларда  ачык дәрес, 1- 4 классларда төрле  чаралар һәм 18 нче январь көнне 5 класста Мазитова Р.Г. «Шәхес һәм аның характеры» дигән темага ачык дәрес үткәрде.

 Мәктәптә гыйнвар айлыгы “Мин һәм минем мәктәбем” исеме астында үтә. Шул уңайдан IX сыйныфларда  “Мәктәпнең 80 еллык тарихы” дигән темага класс сәгате үткәрелде. Укучылар бу көнне,  мәктәп музеенда булып, туган мәктәпләренең 80 еллык тарихы белән таныштылар. Класс җитәкчесе Галимуллина Д.Г., мәктәпнең үткәне белән  бүгенгесен чагыштырып караганнан соң, укучыларга киләчәк мәктәбен ничек күзалдына китерүләрен сурәтләп, инша язарга тәкъдим итте.